Forbes: Teılor Svıft álemdegi eń qymbat ánshi atandy
ASTANA. QazAqparat - Forbes jýrnaly álemdegi eń qymbat ánshilerdiń reıtıngin jasady, onda jylyna 170 mln. dollar (2016 jyldyń maýsymyna deıingi kórsetkish) tabys tapqan Teılor Svıft kósh bastap tur.
Tabysynyń basym bóligin mamyr aıynda Japonııada bastalǵan «1989» kontserttik týrynan túsken kirister quraıdy. Sondaı-aq, Svıft dıetalyq gazdalǵan sýsynnyń, Apple óniminiń jáne Keds kompanııasynyń aıaq kıimderiniń jarnamasynan da kólemdi tabys tapqan. «Onyń tyńdarmandary jyldan-jylǵa ósip keledi jáne olardy naryqtyń túrli salalarynan keziktirýge bolady», - dep atap ótti Fox Rothschild zańgerlik kompanııasynyń shoý-bıznes jónindegi sarapshysy Lorı Lendrıý.
Ekinshi orynǵa ánshi Adel $80,5 mln. nátıjesimen turaqtady. Bul kórsetkish ázirge ánshiniń eń iri qarjylyq tabysy. Onyń tabysynyń negizgi bóligin «25» albomynyń satylymy jáne óner kórsetýinen túsken aqsha quraıdy. Úshinshi orynda Madonna tur, onyń jyldyq tabysy $76,5 mln. bolǵan. 2013 jyly Madonnanyń birinshi orynda turǵanyn atap ótken jón.
Úshtikke enbese de, tizimniń aldyńǵy qatarynan oryn alǵan Rıanna ($75 mln), Beıonse ($54 mln), Ketı Perrı ($41 mln), Djennıfer Lopes ($39,5 mln), Brıtnı Spırs ($30,5 mln), Shanaııa Tveın ($27,5 mln) jáne Selın Dıon ($27 mln) bar.
