Forbes reıtıngisinde álemdegi eń baı adam bir saǵat ishinde eki ret ózgerdi
ASTANA. QazAqparat - Tesla jáne SpaceX kompanııalarynyń negizin qalaýshy jáne jaqynda Twitter áleýmettik jelisiniń ıesi bolǵan Ilon Mask búgin Forbes jýrnalynyń eń dáýletti adamdar tizimindegi ornyn eki ret joǵaltty.
Endi ol tizimde LVMH frantsýz tobynyń prezıdenti Bernar Arnodan keıin tur. Bul týraly QazAqparat VVS aqparat agenttigine silteme jasap habarlaıdy.
Sársenbi kúni saǵat 15:30-16:30 arasynda Masktyń dáýleti $185,1-185,8, al Arnoniki $185,3-185,7 boldy. Osy ýaqyt ishinde Arno eki ret birinshi orynǵa kóterildi. Mask Forbes jýrnalyndaǵy mıllıarderler tiziminde alǵash ret 2021 jyldyń kókteminde kósh bastaǵan. Sol kezde onyń taza baılyǵy 219 mlrd dollarǵa jetip, Forbes dáýletin 171 mlrd dollarǵa baǵalaǵan Amazon-nyń negizin qalaýshy Djeff Bezosty artta qaldyrdy. Ol kezde frantsýz kásipkeri Bernar Arno úshinshi orynda bolatyn. Ol alǵash ret 2020 jyly úzdik «úshtikke kirdi» - sodan beri Arno otbasynyń baılyǵy, Forbes málimetinshe, eki eseden astam ósti (76-dan 158 mlrd dollarǵa deıin).
Masktyń «quldyraýy» mıllıarderdiń bıylǵy kóktemde Twitter-di 44 mlrd-qa satyp alý týraly usynys jasaǵannan keıin Tesla aktsııalarynyń qunynyń kúrt tómendeýimen túsindiriledi.
Grınvıch boıynsha saǵat 19:00-de Masktyń baılyǵy $185,8 mlrd, Arnoniki $184,7 mlrd. quraǵan. Úshinshi orynda – úndi mıllıarderi Gaýtama Adanı (134,2 mlrd dollar). Reıtıng naqty ýaqyt rejıminde jańartylady.
Foto: Getty Images
