Forbes Obamany álemniń eń bedeldi adamy dep tanydy
ASTANA. 6 jeltoqsan. QazAqparat - Forbes jýrnalynyń nusqasy boıynsha AQSh Prezıdenti Barak Obama álemdegi eń bedeldi adamdardyń jyl saıynǵy reıtınginde kóshbasshylyǵyn saqtap qaldy.
Jýrnaldyń tizimine 71 adam endi.
Obama reıtıngti ekinshi jyl qatarynan bastap keledi. Basylym óziniń tańdaýyn Obama prezıdenttik saılaýda qajetti upaı sandaryn jınaı alǵandyǵymen jáne bul oǵan aldaǵy tórt jylda óziniń saıası bastamalaryn júzege asyrý múmkindigin beretindigimen túsindirdi.
Reseı Prezıdenti Vladımır Pýtın 2011 jyly ıelengen ekinshi orynnan úshinshi orynǵa syrǵydy. Oǵan «bıliktiń oppozıtsııaǵa qarsy óz kúshin kórsetýiniń arqasynda» úshinshi orynda qalýǵa múmkin boldy, dep jazady jýrnal. Ekinshi oryndy Forbes Germanııa Kantsleri Angela Merkelge berdi.
Tórtinshi oryn Microsoft kompanııasynyń negizin salýshy Bıll Geıtske berildi. Besinshide - Rım Papasy Benedıkt XVI, altynshy orynda - AQSh Federaldy rezerv júıesiniń basshysy Ben Bernanke, jetinshide - Saýd Arabııasynyń koroli Abdalla ıbn Abdel Azız, segizinshi orynda - Eýropa ortalyq bankiniń basshysy Marıo Dragı. Toǵyzynshy oryndy jýrnal Qytaı Kommýnıstik partııasy Ortalyq komıtetiniń bas hatshysy Sı Tszınpınge berdi. Aldyńǵy ondyqty Brıtanııa premeri Devıd Kemeron tuıyqtady.
