Forbes Qazaqstannyń 2026 jylǵy eń yqpaldy 50 kásipkerin atady
ASTANA. KAZINFORM — Forbes Kazakhstan jýrnaly Qazaqstannyń eń yqpaldy 50 kásipkeriniń 16-shy reıtıngin jarııalady. Bıyl tizimge tórt kásipker alǵash ret endi.
Basylymnyń málimetinshe, bıylǵy reıtıng Qazaqstandaǵy iri mámilelerdiń bıznes ókilderi arasyndaǵy yqpaldyń ózgerýine qalaı áser etkenin kórsetedi. Kásipkerlerdiń yqpalyn baǵalaýda olardyń baılyǵy ǵana emes, ekonomıkanyń negizgi salalaryndaǵy orny, iri jobalarǵa qatysýy, kásiporyndar men óńirlerdiń damýyna yqpal etý múmkindigi de eskerilgen.
Alǵashqy ondyqqa kimder kirdi?
Reıtıngtiń kóshin Vıacheslav Kım bastady. Ol buǵan deıin 2023 jyly da birinshi orynǵa ıe bolǵan. Bir jylda kásipkerdiń baılyǵy 700 mln dollarǵa artyp, 7,8 mlrd dollarǵa jetti.
Onyń negizgi aktıvi — Kaspi.kz kompanııasyndaǵy 20,75 paıyzdyq úlesi. Budan bólek, «Eltop Soft» jáne «Pozıtıv Invest» JShS-lerinde úlesi bar. Sondaı-aq «Alseko» AQ arqyly «Astana-ERTs» JShS-in baqylaıdy.
Ekinshi orynǵa Bolat Ótemuratov (ForteBank, Ritz-Carlton jáne Rixos qonaqúıleri), úshinshi orynǵa Tımýr Qulybaev (Halyk Bank, Viled Group, QazaqOil janarmaı quıý stantsııalary jelisi) ıe boldy.
Tórtinshi orynǵa Nurlan Smaǵulov (Astana Motors, MEGA saýda-oıyn-saýyq ortalyqtary jelisi) jaıǵasty. Al alǵashqy bestikti reıtıngke jańadan engen Shahmurat Mýtalıp túıindedi.
Odan keıingi oryndardy Tımýr Týrlov (Freedom Holding Corp.), Nurlan Artyqbaev (Qazaq Stroy, «Qazaqmys»), Andreı Lavrentev («Allıýr», Qarmet), Aıdyn Rahymbaev (BI Group) jáne Vladımır Kım (KAZ Minerals, Bank RBK) ıelendi.
Reıtıngke jańadan engen tórt kásipker
Bıyl eń yqpaldy 50 kásipkerdiń qataryna tórt jańa esim qosyldy.
Integra Construction KZ kompanııasynyń benefıtsıary Shahmurat Mýtalıp Eurasian Resources Group (ERG) kompanııasynyń 39,3 paıyzdyq úlesin satyp aldy. Sondaı-aq altyn óndiretin «Altynalmas» kompanııasyn satyp alý týraly kelisimge qol qoıdy.
Qazaq Stroy kompanııasynyń negizin qalaýshy Nurlan Artyqbaev «Qazaqmys» korporatsııasyn óz baqylaýyna aldy.
Qudrat Shamıev ERG-diń Qazaqstandaǵy kásiporyndaryna basshylyq etti.
Reıtıngke alǵash ret engen taǵy bir kásipker — halyqaralyq Harvest Group kompanııasynyń negizin qalaýshy Almaz Álsenov. Ol Qazaqstanda agroónerkásiptik klaster qurý josparyn iske asyryp jatyr.
Eske sala keteıik, buǵan deıin Forbes jýrnaly 2025 jylǵy álemdegi eń baı adamdar reıtınginde qazaqstandyq jeti kásipkerdiń esimin ataǵan edi. Olar — Vıacheslav Kım, Mıhaıl Lomtadze, Tımýr Týrlov, Vladımır Kım, Tımýr jáne Dınara Qulybaevtar, sondaı-aq Bolat Ótemuratov.
