Forbes qazaqstandyq olımpıadashylardyń kıim úlgisin úzdik dep tanydy

NUR-SULTAN. QazAqparat - Tanymal Forbes jýrnaly olımpıadalyq formanyń úzdik 8 dızaınyn anyqtady. Jýrnaldyń sholýshysy Stefan Rabımov túzgen úzdik ýnıformalar reıtınginde Qazaqstan komandasynyń formasy da bar, dep habarlaıdy QazAqparat Olympic.kz saıtyna silteme jasap.

Úzdik formalar tizimine #teamKZ atletterinen bólek, AQSh, Lıberııa, Reseı, Chehııa, Qytaı, Ońtústik Afrıka jáne Japonııa komandalarynyń formasy engen.

Qazaqstan komandasynyń formasyn sıpattaı kele, avtor tústerdiń jaqsy úılesim tapqanyna, eń bastysy – jobadaǵy komandalyq jumystyń joǵary bolǵanyna erekshe nazar aýdarady. Óıtkeni, formany daıyndaý barysyna sportshylar da qatysqan bolatyn.

«Qazaqstan komandasynyń otyz bes múshesi formany daıyndaý barysyna tikeleı aralasty. Dızaıner Saltanat Baımuhamedova matany, tústi jáne dekoratıvti elementterdi tańdaý kezinde komandamen birlese jumys istegen. Bul sportshylardyń qoldaýdy sezinýine, olımpıadaǵa aparar jolda shabyttanýyna áser etti.

Aspan tústes kók tús qazaq dalasyndaǵy shegi joq aspandy eske salady. Bul el astanasy men Almaty qalasynyń sán ortalyǵy ekenin odan ári aıqyndap, eki qala arasyndaǵy mádenı básekelestikti de arttyra túsedi. Olımpıadalyq rýh durys nasıhattalsa, bári de jeńiske jetedi», - dep jazdy avtor.

Ýnıformanyń tanystyrylymyna, sondaı-aq, arnaıy fotosessııaǵa qazaqstandyq olımpıadashylar qatysty.