Forbes: Ilon Mask álemdegi eń baı adamdardyń bestigine endi

Basylym málimetinshe, qazirgi kezde dáýleti 74 mıllıard dollardan asyp otyrǵan Mask alǵash ret mıllıarderler reıtınginde osynshama joǵary kóterilip, Ýorren Baffet pen Stıv Balmerden ozyp ketken.

Naýryz aıynyń ortasynda 49 jastaǵy Masktiń esimi Forbes jýrnalynyń mıllıarderler tiziminde 31-shi orynda bolǵan. Sol kezde onyń jeke kapıtaly 25 mıllıard dollarǵa jýyq edi. Sodan beri dáýleti shamamen úsh ese ósip, 74,2 mıllıard dollardy quraǵan – onyń barlyǵy Tesla-nyń arqasynda.

Forbes dúısenbi kúni ótken saýda kezinde Tesla aktsııalary taǵy 9,5 paıyzǵa qymbattap, 1 643,00 AQSh dollaryna deıin jetken. Bul 29 maýsymnan beri, nebári úsh aptada 60 paıyzǵa, jáne tek 2020 jyly 300-ge jýyq paıyzǵa kóbeıgenin kórsetip tur.

Endi Tesla 304,5 mıllıard dollar naryqtyq kapıtaldandyrýy bar tek eń baǵaly avtomobıl kompanııasy ǵana emes, onyń quny Ford, Ferrari, General Motors jáne BMW kompanııalaryn qosa alǵandaǵy baǵadan artyq.

Mask Forbes-taǵy eń baı amerıkandyq azamattarynyń tizimine alǵash ret 2012 jyly engizilip, sol kezde 2,4 mıllıard dollar taza tabyspen 190-shy orynda boldy. Bıylǵy jyldyń 1 qańtarynda ol ǵalamshardaǵy eń baı adamdar tiziminde 37-shi orynnan kórindi. Olaı bolǵanymen, Tesla-nyń aıaqasty jáne áserli ósimi ony álemdegi eń dáýletti adamdardyń tizimine kirgizdi.

Masktiń ózi bolsa, aıdyń basynda Forbes jýrnalymen hat jazysý kezinde ol úshin sandar men jeke kapıtaly mańyzdy emes ekenin málimdedi. «Sandar ósedi, túsedi, is júzinde adamdar jaqsy kóretin tamasha ónimder shyǵara bilý mańyzdy», - dep jazdy ol.

Ǵalamshardyń eń baı adamdarynyń reıtınginde Masktiń aldynda Amazon korporatsııasynyń bastyǵy Djeff Bezos, frantsııalyq LVMH kompanııalar tobynyń basshysy Bernar Arno, Microsoft negizin qalaýshy Bıll Geıts jáne Facebook basshysy Mark Tsýkerbergtiń esimderi tur.