Forbes álemniń eń joǵary aqy tólenetin ártisterin anyqtady
NUR-SULTAN. QazAqparat – Dýeın Djonson eki jyl qatarynan Forbes nusqasy boıynsha álemdegi eń joǵary aqy tólenetin ártister tizbesin bastap keledi. Bul tizim basylym saıtynda jarııalandy, dep habarlaıdy QazAqparat.
Djonsonnyń jyldyq tabysyn Forbes 87,5 mıllıon dollarǵa baǵalady.
Osy jylda Netflix-te shyǵatyn «Qyzyl habarlama» (Red Notice) fılmindegi róli úshin ártistiń 23,5 mıllıon dollar alǵandyǵy atap ótilgen. Buǵan qosa Djonsonnyń birinshi orynǵa shyǵýy onyń Under brendimen shyǵarylatyn Armour Project Rock erler sporttyq kıiminiń suranysqa ıe bolýymen baılanysty.
Reıtıngte ekinshi oryndy jyldyq tabysy 71 mıllıon dollarǵa baǵalanǵan kanadalyq ártis Raıan Reınolds ıelendi. Atap aıtqanda, «Bulyńǵyr altylyq» (6 Underground) jáne «Qyzyl habarlama» (Red Notice) fılmderindegi rólderi úshin ol 20 mıllıonnan astam dollar tapqan.
Eń joǵary aqy tólenetin ártister tiziminde úshinshi oryndy jyldyq tabysy 58 mıllıon dollardy quraıtyn amerıkalyq Mark Ýolberg enshiledi.
Ol osynshama aqshany «Mak-Mıllıondar» (McMillions) jáne «Ýoll-strıt» (Wahl Street) derekti fılmderiniń prodıýseri retinde tapqan.
Sonymen birge tizimniń birinshi ondyǵyna Ben Afflek ($55 mln), Vın Dızel ($54 mln), Akshaı Kýmar ($48 mln), Lın-Manýel Mıranda ($45,5 mln), Ýıll Smıt ($44,5 mln), Adam Sendler ($41 mln) jáne Djekı Chan ($40 mln) engen.
