Forbes álemdegi eń jas mıllıarderdiń esimin atady
ASTANA. QazAqparat - Amerıkandyq model «Kardashıandar otbasy» realıtı-shoýyna qatysýshy Kaılı Djenner álemdegi eń jas mıllıarder qyz atandy. Kaılı Djenner 21 jasynda 1 mıllıard dollar taýyp, Mark Tsýkerbergtiń rekordyn jańartty, dep habarlaıdy Forbes.
Nebári 21 jastaǵy boıjetkenniń kirisiniń negizgi bóligi 2016 jyly negizi qalanǵan kosmetıkalyq Kylie Cosmetics kompanııasynan quıylyp jatyr. Sondaı-aq tanymal sán úılerimen jasalǵan kelisimsharttary da mol tabys kózine aınalǵan. Áleýmettik jelilerden túsip jatqan aqsha da az emes.
Djennerdiń ózi qarjylyq tabysyna 128 mıllıon jazylýshysy bar Instagram-nyń úlesi mol ekenin moıyndaıdy.
«Men muny kútken joqpyn. Bul men úshin úlken tabys ári qýanyshty oqıǵa», - dep atap ótti kásipker qyz.
Aıta ketken jón, budan buryn eń baı jas adam tıtýly Facebook negizin qalaǵan Mark Tsýkerbergke tıesili edi. Ol óziniń alǵashqy mıllıardtaryna 23 jasynda qol jetkizgen bolatyn.
