Forbes álemdegi eń qymbat brendterdiń júzdigin atady
ASTANA. QazAqparat - Amerıkalyq Forbes jornaly álemdegi eń qymbat 100 brendtiń reıtıngisin jarııalady, dep habarlady Rosbalt.
Basylym atap ótkendeı, reıtıngti qurǵanda sońǵy úsh jyldaǵy kompanııa tabysy men brendtiń túrli salalardaǵy kiriske áseri eskerildi. Oǵan 15 el men 20 saladaǵy brendter endi. Reıtıngtiń shamamen jartysy - amerıkandyq brendter.
Tizimniń basynda Apple kompanııasy, onyń brendi 145,3 mlrd. dollarǵa baǵalandy. Ótken jyldyń sońǵy toqsanynda kompanııa álem boıynsha 74,8 mln. smartfon satty, toqsandaǵy paıda 18 mlrd. dollardy qurady.
Ekinshi orynda quny 69,3 mlrd. dollar bolatyn Microsoft brendi, odan keıin - Google ($65,6 mlrd).
Reıtıngtegi 4-orynda - Coca-Cola kompanııasynyń brendi, quny $56 mlrd, besinshi - IBM ($49,8 mlrd), altynshy - McDonald's ($39,5 mlrd), jetinshi - Samsung ($37,9 mlrd), segizinshi - Toyota ($37,8 mlrd), toǵyzynshy - General Electric ($37,5 mlrd). Reıtıngtiń ondyǵyn Facebook tuıyqtady. Áleýmettik jeli brendi 36,5 mlrd. dollarǵa baǵalandy.
Reıtıngtegi alǵashqy 20 brendke Disney, AT&T, Amazon, Louis Vuitton, Cisco, BMW, Oracle, Nike, Intel, Wal-Mart endi.
