Forbes álemdegi eń baı áıeldi atady
ASTANA. QazAqparat - L'Oréal kosmetıkalyq ımperııasynyń murageri jáne kompanııa dırektorlary keńesiniń tóraıymy Fransýaza Betankýr-Maıers Forbes nusqasy boıynsha 2019 jylǵy álemdegi eń baı áıelge aınaldy. Onyń qarjysy 49,3 mlrd dollarǵa jetken.
Ǵalamshardaǵy eń baı adamdar reıtınginde Maıers 15-orynda. Búgin, 5 naýryzda barlyq tizim jarııalanady, dep naqtylaıdy basylym.
Ótken jyly onyń baılyǵy 7,1 mıllıard dollarǵa kóbeıgen. Buǵan negizinen kompanııa aktsııasynyń qymbattaýy yqpal etti.
Aıta ketken jón, 2018 jyly Forbes reıtıngi boıynsha eń baı áıelder tiziminde Walmart gıpermarketiniń negizin qalaýshynyń qyzy Elıs Ýolton birinshi bolǵan edi. Basylym onyń qarjylyq jaǵdaıyn 46 mıllıard dollarǵa baǵalaǵan.
