Forbes 2017 jylǵy eń kóp aqsha tólenetin fýtbolshylardy atady
ASTANA. QazAqparat - Forbes jýrnaly qurastyrǵan 2017 jylǵy eń kóp aqsha tólenetin fýtbolshylardyń tiziminde portýgalııalyq Krıshtıaný Ronaldý birinshi orynda tur.
32 jastaǵy Madrıdtiń «Real» komandasynyń shabýylshysy jáne Portýgalııa quramasynyń sapynda Eýropa chempıony atanǵan Ronaldý tizimde qatarynan tórtinshi ret birinshi oryndy enshiledi. Basylymnyń baǵalaýy boıynsha 2016 jyldyń 1 maýsymynan 2017 jyldyń mamyry aralyǵynda oıynshy 93 mıllıon dollar tapqan. Onyń shamamen 58 mıllıony - onyń jalaqysy klýbtaǵy bonýsy, al qalǵandary jarnamalyq kelisimsharttardan túsken.
Ekinshi orynda - «Barselona» jáne Argentına quramasynyń oıynshysy Lıonel Messı. Onyń kirisi jylyna 80 mıllıon dollardy quraıdy. Munyń 50 mıllıony - jalaqysy men klýbtaǵy bonýstary.
Úshinshi oryn tabysy 34 mıllıon dollarǵa jetken «Barselonanyń» taǵy bir oıynshysy brazılııalyq Neımardyń enshisine tıdi.
