Fontanda kóz jumǵan jigit UBT tapsyrýǵa kelgen: Mınıstr istiń mán-jaıyn aıtty

ASTANA. KAZINFORM — Ǵylym jáne joǵary bilim mınıstri Saıasat Nurbek Almatyda sýburqaq janynda talapkerdiń qaıtys bolýyna pikir bildirdi. 

«Oqıǵa saǵat 16.00-de bolǵan. Kún raıy óte ystyq bolyp turǵan. Tyıym salatyn belgi turǵanyna qaramastan, sýburqaqqa túsken. Ol sýburqaqtyń eki „tostaǵany“ bar, ol týra ishine kirgen. Ólimniń sebebi búgin sot-medıtsınalyq saraptamadan keıin belgili bolýy kerek. Aldyn ala málimet boıynsha, júregi toqtap qalǵan nemese tok soqqan bolýy múmkin», — dedi ol.

Mınıstr qaıtys bolǵan talapkerdiń Almatydaǵy № 185 mektepti támamdaǵanyn aıtty.

Ýnıversıtetke UBT tapsyrý úshin kelgenimen, elektr qýatynyń aqaýyna baılanysty test tapsyryp úlgermegen. 

«Sot-medıtsınalyq saraptamanyń qorytyndysyn kútý kerek. Bul máselemen Bostandyq aýdanynyń polıtsııa basqarmasy aınalysyp jatyr. Salǵyrttyq saldary ma, álde oqys oqıǵa ma, ázirge bilmeımiz», — dedi Saıasat Nurbek.

Eske sala keteıik, 19 maýsym kúni Almatyda ál-Farabı atyndaǵy Qazaq ulttyq ýnıversıteti aýmaǵynda jasóspirim qaıtys bolǵanyn habarlaǵan edik.