Fonogramma paıdalanǵandarǵa aıyppul salynady
ASTANA. KAZINFORM — Zańdaǵy jańa túzetýlerge baılanysty fonogramma qoldaný tártibi qalaı ózgeredi? Bul suraqqa Mádenıet jáne aqparat mınıstrligi jaýap berdi.
— Májilis depýtattarynyń bastamasymen kóterilgen bul norma tek daýys (vokal) fonogrammalaryn paıdalanýǵa tyıym salý týraly bolyp otyrǵanyn atap ótemiz. Mádenı-buqaralyq is-sharalar kezinde 200-den astam kórermenniń aldynda oryndaýshynyń aldyn ala jazylǵan daýysymen (vokalmen) óner kórsetýine jol berilmeıdi. Daýys (vokal) fonogrammasyn paıdalaný tek arnaıy beıimdelmegen jáne án aıtýǵa arnalmaǵan oryndarda (ıppodromdarda, demalys aımaqtarynda, saıabaqtarda, alańdarda, kóshelerde) ruqsat etiledi, ıaǵnı ashyq alańdarda ótkizýge bolady. Bul atalǵan oryndardyń jandy daýysta óner kórsetýge tehnıkalyq turǵydan beıimdelmeýimen jáne aýa raıy jaǵdaılaryna baılanysty, - delingen mınıstrliktiń Kazinform agenttigine bergen jaýabynda.
Sonymen qatar sapaly teledıdar kontentin daıyndaý, telebaǵdarlamalar men jobalardy túsirý barysynda, atap aıtsaq kontserttiń tolyq jazbasyn, dybystyń sapaly jazylýyn kózdeıtin televızııalyq jazbalar barysynda qoldanýǵa ruqsat beriledi.
Fonogrammaǵa aıyppul mólsheri qandaı bolmaq?
— Qazirgi ýaqytta Májilis depýtattary mýzykalyq shyǵarmalardy oryndaý kezinde daýys fonogrammalaryn paıdalanǵany úshin ákimshilik jaýapkershilik belgileýdi kózdeıtin túzetýlerdi ázirlep jatyr. Usynylǵan ózgeristerge sáıkes, bir myń aılyq eseptik kórsetkish mólsherinde aıyppul kózdelýi múmkin. Fonogramma paıdalanǵany úshin jaýapkershilik Ivent-uıymdar, jeke kásipker (ártistiń óner kórsetýin uıymdastyrýshy), vokalıster men shyǵarmashylyq ujymdarǵa júkteletin bolady. Sondyqtan talapty buzý ánshilerge tıimsiz bolý úshin, aıyppul mólsheri de joǵary belgilengen, - dep atalyp ótken vedomstvo aqparatynda.
Eske salsaq, bıyl qarasha aıynda Parlament fonogrammany paıdalanýdy shekteý týraly zańdy qabyldady.