Fon der Lıaıen Eýropalyq komıssııanyń barlaý qyzmetin qurýdy josparlap otyr

ASTANA. KAZINFORM – Eýropalyq komıssııa tóraǵasy Ýrsýla fon der Lıaıen Eýropalyq odaqtyń jeke barlaý qyzmetin qurýdy kózdep otyr. Bul qurylym múshe elderdiń ulttyq arnaıy qyzmetterinen alynǵan aqparatty jınap, taldaýmen aınalysady, dep habarlaıdy Euronews.

Financial Times basylymynyń málimetinshe, resmı túrde jańa qyzmettiń maqsaty — bar barlaý derekterin neǵurlym tıimdi paıdalaný. Alaıda dıplomatııalyq ortada bul bastama Eýropalyq komıssııa men onyń basshysynyń ókilettigin keńeıtý áreketi retinde qabyldanyp otyr.

Sarapshylardyń pikirinshe, jańa qurylym Eýropalyq syrtqy ister qyzmetimen tyǵyz jumys isteıdi, biraq bul uıymnyń jetekshisi Kaıa Kallastyń yqpalyn azaıtyp, fon der Lıaıenniń bedelin arttyrýy múmkin.

– Eýropa qazir barlaý salasynda da táýelsiz bolýǵa umtylýda, – dedi Eýrokomıssııa josparlarymen tanys sheneýnik.

Eýropalyq komıssııanyń resmı ókili Paýla Pınonyń aıtýynsha, jańa bólimshe Eýropalyq syrtqy ister qyzmetin tolyqtyryp, qaýipsizdik máselelerine arnalǵan «Qaýipsizdik kollegııasynyń» jumysyna úles qosady.

Bul kollegııaǵa 26 komıssar men Eýropalyq komıssııa tóraǵasy kiredi. Ol alǵash ret bıyl naýryzda qaýipsizdik salasyndaǵy ókilettikter keńeıtilgen kezde jınalǵan bolatyn.

Sonymen birge Brıýsseldegi joǵary laýazymdy dıplomattar jańa qurylymnyń paıda bolýy ekiudaı júıege jáne bılik úshin básekege ákelýi múmkin dep qaýiptenedi. Olardyń aıtýynsha, eger fon der Lıaıen jospary júzege assa, bul keıbir sheneýnikterdiń yqpalyn álsiretip, mansabyna áser etýi yqtımal.

Jospar ázirge EO-nyń 27 múshe eline resmı túrde usynylmaǵan. Biraq ol ulttyq barlaý organdarynan jańa eýropalyq qurylymǵa qyzmetkerler jiberýdi qarastyrady.

Aıta keteıik, Ýrsýla fon der Lıaıen taǵy da senimsizdik votýmynan aman qaldy.