Fon der Lıaıen: EO kóshbasshylary men Zelenskııdiń kelissózderinde jaqsy nátıje bar

ASTANA. KAZINFORM — EO Komıssııasynyń basshysy Ýrsýla fon der Lıaıen Eýropalyq odaq kóshbasshylary men Vladımır Zelenskıı Ýkraınadaǵy qaqtyǵysty retteý josparyn talqylaý barysynda oń nátıjege qol jetkize alǵanyn málimdedi, dep habarlaıdy TASS.

«Búgin Vladımır Zelenskıımen jaqsy talqylaý ótti, ol [Frantsııa prezıdenti Emmanıýel] Makronmen jáne basqa da eýropalyq kóshbasshylarmen kezdesti. <…> Biz jaqsy ilgerileýge qol jetkizdik jáne osy aptada óz usynystarymyzdy berýdi josparlap otyrmyz», – dep jazdy fon der Lıaıen X áleýmettik jelisinde.

1 jeltoqsan kúni Makron men Zelenskıı Parıjde kelissóz ótkizdi. LCI telearnasy Elıseı saraıyndaǵy derekkózge silteme jasap habarlaǵandaı, kezdesý barysynda olar Ulybrıtanııa premer-mınıstri Kır Starmermen, Ýrsýla fon der Lıaıenmen, Eýropalyq keńes tóraǵasy Antonıý Koshtamen, NATO bas hatshysy Mark Rıýttemen jáne AQSh prezıdenti Donald Tramptyń arnaıy ókili Stıven Ýıtkoffpen telefon arqyly sóılesti. Bul — Zelenskııdiń eki apta ishindegi Frantsııaǵa ekinshi sapary jáne ýkraınalyq qaqtyǵys bastalǵaly bergi onynshy sapary.

30 qarashada Florıda shtatynyń ońtústiginde AQSh pen Ýkraına arasynda Vashıngton usynǵan Ýkraına qaqtyǵysyn retteý josparyna arnalǵan kelissózder ótti. AQSh tarapynan memlekettik hatshy Marko Rýbıo, Ýıtkoff jáne Tramptyń kúıeý balasy Djared Kýshner qatysty. Ýkraın delegatsııasynyń quramyna Ulttyq qaýipsizdik jáne qorǵanys keńesiniń hatshysy Rýstem Ýmerov pen Syrtqy ister mınıstriniń birinshi orynbasary Sergeı Kıslıtsa kirdi.

Aıta keteıik, Marko Rýbıo AQSh pen Ýkraına delegatsııalarynyń kelissózi nátıjeli ótkenin málimdedi. 

Buǵan deıin Tramptyń Ýkraınadaǵy beıbitshilik jospary Florıda men Parıjde talqylanatynyn jazdyq.