Fon der Lıaıen EO Izraılmen saýda seriktestigin toqtatatynyn jarııalady
ASTANA.KAZINFORM – Eýropalyq Odaq Izraıl tólemderin jáne onymen seriktestik kelisimin ishinara toqtatady. Bul týraly Ýrsýla fon der Lıaıen Eýroparlament depýtattarynyń aldynda aıtty, dep habarlaıdy Euronews.
Fon der Lıaıen ádetten tys qataldyqpen Gazadaǵy «qoldan jasalǵan asharshylyqty» jáne Izraıldiń eki birdeı memlekettik sheshimge nuqsan keltirýge baǵyttalǵan áreketin aıyptady.
- Gazada bolyp jatqan jaǵdaıdy elestetýdiń ózi qıyn. Eýropa burynǵydaı qozǵalysqa jetekshilik etýi kerek, - dedi fon der Lıaıen.
Gazadaǵy soǵys 2023 jyly 7 qazanda HAMAS sodyrlarynyń Izraıldiń ońtústigine jasaǵan shabýylynan bastaldy. 1200-ge jýyq adam qaza tapty, olardyń basym bóligi beıbit turǵyndar. HAMAS 50-ge jýyq adamdy kepilde ustap otyr. Oǵan jaýap retinde Izraıl áskerı operatsııa bastady. Saldarynan Gaza sektorynyń densaýlyq saqtaý mınıstrliginiń málimetinshe, 64 myńnan astam palestınalyq qaza tapty. Olardyń kóbi áıelder men balalar.
Eýropalyq komıssııa tóraǵasy Ýrsýla fon der Lıaıen Izraıldi qoldaýyn toqtatýdy usyndy. Sonyń ishinde azamattyq qoǵamǵa kómekten basqa tólemderdi toqtatý isi de bar. Ol sondaı-aq 1995 jyly qol qoıylǵan EO-Izraıl qaýymdastyǵy kelisiminiń saýdaǵa qatysty bóligin ishinara toqtatýdy usyndy.
EO buǵan deıin Izraıldiń Gazadaǵy áreketine qatysty kelisimdi qaıta qaraýǵa kelisti. EO dıplomatııasynyń basshysy Kaııa Kallas 10 sanktsııany atap, Eýropalyq komıssııa Izraıldiń Horizon Europe ǵylymı baǵdarlamasyna qatysýyn shekteýdi usyndy.
Alaıda, kóptegen elder evreı memleketimen qarym-qatynasty saqtaýǵa yntaly.Soǵan baılanysty Eýropadaǵy tereń kózqaras qaıshylyǵy ázirge konsensýsqa qol jetkizýge múmkindik bermeı otyr. Qaýymdastyq kelisiminiń saýda bóligin toqtata turý úshin kópshilik daýysy qajet, biraq Germanııa nemese Italııa sııaqty iri elder bul qadamdy qoldaýy ekitalaı.
- Men kópshiliktiń daýsyn jınaý qıyn bolatynyn túsinemin. Biraq jaýapkershilikti bárimiz alýymyz kerek, - dedi fon der Lıaıen.
Qorytyndylaı kele, Eýrokomıssııa basshysy Izraıldegi «ekstremıst mınıstrler» men «agressıvti qonystanýshylarǵa» sanktsııa salýǵa ýáde berdi.
Kóptegen eýropalyq elder, sonyń ishinde Shvetsııa men Nıderland, okkýpatsııalanǵan Batys jaǵalaýda palestınalyqtarǵa qarsy zorlyq-zombylyqqa birneshe ret shaqyrǵan Izraıldiń eki mınıstri Itamar Ben-Gvır men Betsalel Smotrıchke sanktsııa salyp úlgerdi.
- Eýropa Iordan ózeniniń batys jaǵalaýyndaǵy palestınalyqtarǵa qarsy adam quqyqtarynyń eleýli jáne júıeli túrde buzylýyna jaýapty tulǵalar men uıymdarǵa sanktsııa salyp qoıǵan, - delingen Eýropalyq keńes málimdemesinde.
Aıta keteıik, Qatar astanasynyń ortalyǵynda 9 qyrkúıekte jarylys boldy.
Izraıldiń Qatarǵa jasaǵan soqqysy arab elderi, Palestına jáne halyqaralyq uıymdar tarapynan narazylyq pen aıyptaý týdyrdy.
Osyǵan deıin Qatar astanasynda jarylys bolǵany týraly jazdyq.