FlyDubai ushaǵynyń ekinshi ushqyshy kapıtanǵa baltamen shabýyl jasaǵan – BAÁ
ASTANA. KAZINFORM – FlyDubai áýe kompanııasynyń Tel-Avıvke baǵyt alǵan ushaǵynda ekinshi ushqysh komandırge qaýipsizdik baltasymen shabýyl jasap, áýe kemesin basyp alýǵa áreket jasaǵan. BAÁ Bas prokýratýrasy bul oqıǵany «terrorlyq shabýyl jasaýǵa áreket» dep baǵalady, dep habarlaıdy Euronews.
FZ1073 reısinde 182 adam bolǵan. BAÁ Bas prokýrory Hamad Saıf ash-Shamsıdiń aıtýynsha, ekinshi ushqysh ushaqty basqarýdy óz qolyna alýǵa tyrysqan. Qazir oqıǵanyń sebepteri, kúdiktiniń yqtımal baılanystary jáne basqa da mán-jaılar tekserilip jatyr.
Associated Press málimetinshe, kúdikti – Oman azamaty Hamam al-Hammamı. Oman bıligi buǵan deıin onyń radıkaldy kózqarastary bolýy múmkin degen qaýippen ushýyna tyıym salyp, Oman Air kompanııasynda ákimshilik qyzmetke aýystyrǵan.
Keıin ol BAÁ-de ornalasqan FlyDubai kompanııasyna jumysqa qabyldanǵan. Onyń jumysqa ornalasý kezinde qanshalyqty muqııat tekserilgeni ázirge belgisiz.
Izraıl men Oman arasynda dıplomatııalyq qarym-qatynas joq. Sondyqtan tergeýshilerdiń basty suraǵynyń biri – mundaı kúdikke ilikken ushqyshtyń Tel-Avıvke baǵyt alǵan reıstiń kabınasyna qalaı jumysqa kirgeni.
Izraıl premer-mınıstri Bınıamın Netanıahý ekinshi ushqyshtyń «ıslamıstik radıkaldanýǵa» ushyraǵanyn málimdedi, alaıda oǵan dálel keltirmedi.
Ushaq komandıri, Úndistan azamaty Smıt Machchhar beısenbi kúni Saýd Arabııasyndaǵy aýrýhana palatasynan Úndistan premer-mınıstri Narendra Modıge jasaǵan emotsııaǵa toly beıneúndeýinde shabýyl kezinde sońǵy kúshin jınap, kabına esigin ashqanyn aıtty. Osydan keıin jolaýshylar men ekıpaj músheleri ishke kirip, ekinshi ushqyshty zalalsyzdandyryp, ushaqty basqarýdy qalpyna keltirgen.
An unforgettable conversation with Captain Smit, filled with pride and emotions. pic.twitter.com/CCf46PKOWR
— Narendra Modi (@narendramodi) October 2, 2026
BAÁ prezıdentiniń keńesshisi Anvar Gargash úndistandyq ushqysh Smıt Machchhardy batyldyǵy men kásibıligi úshin joǵary baǵalap, ony yqtımal apattyń aldyn alǵan «naǵyz qaharman» dep atady.
Oqıǵa aımaqtaǵy áýe qatynasy men týrızm salasyna da áser etti. BAÁ Izraılge barlyq reısterin toqtatty, al Izraıldiń El Al áýe kompanııasy BAÁ-ge reısterin ýaqytsha toqtatty. Keıin eki el jolaýshylardy qaıtarý úshin arnaıy repatrıatsııalyq reıster uıymdastyrýǵa kelisti.
Aıta keteıik, buǵan deıin Dýbaıdan Tel-Avıvke ushqan reıs apattyq sıgnal berip, Izraıl joıǵysh ushaqtardy áýege kótergen edi.
Ushaq borttaǵy oqıǵadan keıin Saýd Arabııasyna qondy. Al jolaýshylar laınerde ne bolǵanyn aıtyp berdi.
Ushaq bortyndaǵy oqıǵadan keıin Flydubai Izraıl reısterin ýaqytsha toqtatty.
