Flydubai ushaǵyndaǵy shabýylǵa qatysty jańa derek belgili boldy
ASTANA. KAZINFORM — Dýbaı –Tel-Avıv baǵytyndaǵy ushaq ekıpajyna jasalǵan shabýyldy tergeý barysynda kúdiktiniń josparyna qatysty jańa derekter belgili boldy, dep habarlaıdy Kazinform agenttiginiń Taıaý Shyǵystaǵy menshikti tilshisi.
30 qyrkúıekte ushaq komandırine shabýyl jasaǵany úshin ustalǵan Flydubai FZ1073 reısiniń ekinshi ushqyshy Hamam ál-Hammamı tergeýshilerge ushaqty Tel-Avıvtegi Ben-Gýrıon áýejaıyndaǵy ǵımaratqa nemese basqa ushaqqa soqtyrýdy kózdegenin aıtqan.
Bul týraly jeksenbi kúni Izraıl telearnalary habarlady, dep jazady The Times of Israel. BAÁ bıligi tergeý nátıjelerin ázirge resmı túrde jarııalaǵan joq.
BAQ málimetinshe, ekinshi ushqysh áýe kemesiniń komandırin óltirip, reısti qalypty rejımde jalǵastyrýdy jáne qonýǵa ruqsat alýdy josparlaǵan. Qonýǵa jaqyn qalǵanda ol qaýipsizdik qyzmetteri shabýyldyń aldyn alyp úlgermeıtindeı etip, ushaqty áýejaıdaǵy ǵımaratqa nemese basqa ushaqqa baǵyttaýdy kózdegen.
Kúdikti Izraılge jaqyn Iordanııa aýmaǵynyń ústimen ushyp bara jatqan ushaqta kapıtan Smıt Machchharǵa ne sebepti shabýyl jasaǵanyn osylaısha túsindirdi.
Jospardyń júzege asýyna ushaq komandıri Smıt Machchhar kedergi bolǵan. Ol aýyr jaraqatyna qaramastan, kabına esigin ashyp úlgerdi. Sonyń arqasynda jolaýshylar kabınaǵa kirip, shabýyl jasaǵan adamdy toqtatqan. Ushaqty jolaýshylar arasynda bolǵan Flydubai kompanııasynyń eki ushqyshy basqaryp, Saýd Arabııasynyń Tabýk qalasyna qondyrdy.
Izraıl telearnalarynyń habarlaýynsha, ál-Hammamı sońǵy aılarda Ben-Gýrıon áýejaıyna birneshe ret ushyp barǵan. Maýsym aıynda áýejaıǵa barǵan kezde ol shabýylǵa daıyndalý úshin málimet jınaǵan degen boljam bar.
Bastapqyda ol josparyn shilde aıynda júzege asyrmaq bolǵan. Alaıda ekıpaj músheleriniń arasynda dosy bolǵandyqtan, sońǵy sátte bul oıynan bas tartqan.
Izraıldiń 13-telearnasy kúdiktiniń Flydubai kompanııasyna jumysqa ornalasqanǵa deıin-aq shabýyl jasaýdy josparlaǵanyn habarlady. Ol kompanııany Tel-Avıvke reısteri bolǵandyqtan tańdaǵan.
Buǵan deıin ıtalııalyq Corriere della Sera gazeti Izraıl barlaý qyzmetine súıenip, shabýyl nysanasy záýlim ǵımarat bolýy múmkin ekenin jazdy. Basylym málimetinshe, kabına esigi ashylǵan soń ál-Hammamı ushaqty shóldi aımaqqa baǵyttap, basqarý tetikterin isten shyǵarýǵa áreket jasaǵan.
30 qyrkúıek kúni keshke jolaýshylar Izraılge basqa reıspen jetkizildi.
Saýd Arabııasynyń Іshki ister mınıstrligi 1 qazanda ekinshi ushqyshtyń ushaq komandırine shabýyl jasaǵanyn rastady. Ekeýiniń de jaraqat alǵany habarlanyp, jaǵdaılary jaqsarǵan soń BAÁ kúshtik qurylymdarynyń baqylaýymen Abý-Dabıge jetkizildi.
Qazir tergeýdi BAÁ bıligi júrgizip jatyr.
The Times of Israel málimetinshe, ál-Hammamıdiń bergen jaýaby týraly aqparat Izraılge Saýd Arabııasy men BAÁ-degi tergeý barysynda jetken. Maqala jarııalanǵan kezde Izraıl tergeýshileri ony áli ózderi suramaǵan. Ynet dereginshe, BAÁ-de Izraıl mamandary da bar, al buǵan deıin Reuters onyń jaýap alýyna daıyndyq júrip jatqanyn habarlaǵan.
Izraıldiń 12-telearnasynyń habarlaýynsha, Izraıl tarapy BAÁ bıliginen bortserikterden de jaýap alýdy suraǵan.
Ynet joǵary laýazymdy emırattyq derekkózge silteme jasap, ál-Hammamıge ólim jazasy kesilýi múmkin ekenin habarlady.
Eske salaıyq, 30 qyrkúıek kúni tańerteń Flydubai áýe kompanııasynyń Dýbaıdan Tel-Avıvke ushyp bara jatqan ushaǵy Saýd Arabııasynyń ústimen ushyp ótken kezde apattyq belgi berip, baǵytyn ózgertti.
Keıin ushaq bortynda ushqyshtar arasynda tóbeles bolǵany anyqtaldy. Jolaýshylar ushaqtyń apatqa ushyraýyn qalaı toqtatqanyn aıtyp berdi.
Sonymen qatar ushaq bortyndaǵy oqıǵadan keıin Flydubai Izraıl reısterin ýaqytsha toqtatty.
