FlyArystan ushaǵy Delıge shuǵyl qondy

ASTANA. KAZINFORM — 16 qarashada Almatydan Goaǵa baǵyt alǵan FlyArystan ushaǵy Delı áýejaıyna qondy. Oqıǵanyń mán-jaıyn anyqtaý úshin Kazinform agenttiginiń tilshisi áýe kompanııasyna habarlasty.

FlyArystan ushaǵy Delıge shuǵyl qondy
Foto: Maqsat Shaǵyrbaev/Kazinform

Kompanııanyń túsindirýinshe, ushaq Delı áýejaıyna tehnıkalyq sebepke baılanysty qonǵan. Jańartylǵan aqparatqa sáıkes, Delıden Goaǵa ushý 17 qarashada jergilikti ýaqyt boıynsha saǵat 03:05-ke josparlanǵan.

Budan bólek, Goadan Almatyǵa qatynaıtyn FS7416 reısiniń kestesi de ózgerdi. Áýe kemesiniń keshigip kelýine baılanysty bul reıs 17 qarashada jergilikti ýaqyt boıynsha saǵat 06:45-te ushady dep josparlanǵan.

Kútý kezinde eki reıstiń de jolaýshylary qonaqúılerge ornalastyryldy.

— FlyArystan jolaýshylardan keltirilgen qolaısyzdyqtar úshin shyn júrekten keshirim suraıdy jáne túsinistik tanytqandary úshin alǵys bildiredi. Ushý qaýipsizdigi — áýe kompanııasynyń negizgi basymdyǵy, — dep jaýap berdi kompanııanyń baspasóz qyzmeti.