FlyArystan «Turan» fýtbol klýbyn satyp alýdy josparlap otyrǵan joq
TÚRKІSTAN. KAZINFORM – Túrkistan oblysynda «Turan» fýtbol klýbyna ınvestor izdeý jumystary júrip jatyr. Klýbty jekeshelendirý máselesi áli túbegeıli sheshilgen joq, naqty satyp alýshy anyqtalmaǵan.
Buǵan deıin FlyArystan kompanııasy jekeshelendirýge qatysýy múmkin áleýetti úmitkerlerdiń qatarynda atalǵan bolatyn.
Alaıda qazir Túrkistan oblystyq dene shynyqtyrý jáne sport basqarmasy ókilderi áýe kompanııasymen resmı kelissózder júrgizilmegenin atap ótti.
— Búgingi tańda «Turan» fýtbol klýbyn jekeshelendirý máselesine qatysty naqty ınvestor anyqtalǵan joq. FlyArystan áýe kompanııasymen resmı kelissózder júrgizilgen joq. Sheshim qabyldanǵan jaǵdaıda qosymsha aqparat beriledi, — dep habarlady vedomstvo.
Atalǵan basqarmanyń baspasóz qyzmetine jaýapty qyzmetkeri Asqat Myrzahmetov Kazinform agenttigine bergen túsiniktemesinde buǵan deıin jarııalanǵan málimetti fýtbol klýbynyń ujymy ishinde aıtylǵan beıresmı pikirge súıenip taratqanyn jetkizdi.
Klýb ókilderiniń málimetinshe, satyp alýǵa qatysty boljamdar áýe kompanııasymen burynǵy yntymaqtastyq aıasynda týyndaǵan.
— Buǵan deıin FlyArystan klýbqa demeýshilik qoldaý kórsetken bolatyn. Ujym ishinde yqtımal satyp alý jóninde beıresmı boljamdar aıtylǵan. Bul nusqalar izgi nıetten týyndap, jýrnalısterdiń saýaldaryna jaýap berý barysynda jarııa etildi, — dedi klýbtyń medıa-ofıtseri Nurdáýlet Orazbek.
Áýe kompanııasy da bul máselege qatysty resmı ustanymyn bildirdi.
FlyArystan baspasóz qyzmetiniń málimetinshe, kompanııa «Turan» fýtbol klýbyn nemese ózge de sport uıymdaryn satyp alý ne basqarý boıynsha kelissózderdi júrgizip jatqan joq jáne mundaı jospar qurmaǵan.
— Kompanııa klýbty satyp alýǵa úmitker degen aqparat shyndyqqa sáıkes kelmeıdi, — dep atap ótti áýe kompanııasy.
Taıaýda Túrkistan oblysynyń namysyn qorǵaıtyn «Turan» fýtbol klýby elektrondy saýda-sattyqqa shyǵaryldy. Bastapqy baǵasy — 1 054 000 teńge, kepildik jarna — 158 myń teńge. Elektrondyq saýda-sattyq 3 naýryzǵa belgilengen.
