FlyArystan Saýda mınıstrligimen sottasyp, jeńilip qaldy

ASTANA. KAZINFORM — Almaty soty FlyArystan áýe kompanııasyna qatysty Saýda jáne ıntegratsııa mınıstrligi bergen nusqamanyń zańdylyǵyn rastady. Tekserý kezinde tasymaldaýshynyń ishki qaǵıdalarynan jolaýshylardyń quqyǵyn shekteıtin birqatar talap anyqtalǵan.

FlyArystan FlaıArystan  ushaq
Foto: Maqsat Shaǵyrbaev/ Kazinform

Áýe kompanııasyna qatysty tekserýge jolaýshynyń shaǵymy negiz bolǵan. Almaty  boıynsha caýda jáne tutynýshylardyń quqyqtaryn qorǵaý departamenti Tutynýshylardyń quqyqtaryn qorǵaý komıtetimen jáne Astanadaǵy aýmaqtyq departamentpen birlesip jospardan tys tekserý júrgizgen.

Tekserý barysynda FlyArystan kompanııasynyń ishki tasymaldaý qaǵıdalarynan tutynýshylardyń quqyǵyn shekteıtin birneshe talap anyqtaldy. Atap aıtqanda:

  • tasymaldaý sharttaryn birjaqty ózgertý;

  • áýe tasymaldaýshysynyń jaýapkershiligin shekteý;

  • jekelegen alymdardy zańsyz óndirip alý;

  • jolaýshylardyń aqshasyn qaıtarý quqyǵyn shekteý;

  • tutynýshylarǵa aqparat berý talaptaryn saqtamaý;

  • jazbasha narazylyq hat joldaý tásilderin shekteý.

Osy buzýshylyqtarǵa baılanysty áýe kompanııasyna olardy joıý jáne ishki tasymaldaý qaǵıdalaryn Qazaqstan zańnamasyna sáıkestendirý týraly nusqama berilgen.

Alaıda FlyArystan tekserý nátıjeleri men mınıstrlik bergen nusqamanyń zańdylyǵyna sotta daý aıtqan.

2026 jylǵy 21 shildede Almatynyń mamandandyrylǵan aýdanaralyq ákimshilik soty áýe kompanııasynyń nusqamanyń kúshin joıý týraly talabyn qanaǵattandyrmady. Apellıatsııalyq saty da birinshi sot sheshimin ózgerissiz qaldyrdy.

Osylaısha, sot tutynýshylardyń quqyqtaryn qorǵaý organdarynyń avıatsııalyq qyzmetter salasynda memlekettik baqylaý júrgizý ókilettigin jáne kompanııaǵa berilgen nusqamanyń zańdylyǵyn rastady.

Saýda jáne ıntegratsııa mınıstrligi áýe kompanııalarynyń ishki qaǵıdalary zańnamada kepildik berilgen jolaýshylardyń quqyqtaryn shektemeýge tıis ekenin atap ótti. Tasymaldaý sharttary, aqshany qaıtarý tártibi, qosymsha alymdar men shaǵymdardy qaraý máseleleri tutynýshylardyń quqyqtaryn qorǵaý týraly zań talaptaryna saı bolýy qajet.

Eske salaıyq, buǵan deıin Air Astana men FlyArystan avıaotyn kólemi boıynsha burmalanǵan málimetter úshin jaýapqa tartylǵanyn habarlaǵanbyz.