FlyArystan salǵyrttyǵynan ushpaı qalǵan jasóspirimge psıhologııalyq kómek usynyldy

ASTANA. KAZINFORM – Oqý-aǵartý mınıstrligi Balalardyń quqyqtaryn qorǵaý komıteti FlyArystan ushaǵyna jiberilmeı, áýejaıda jalǵyz qalǵan 12 jasar qyzdyń anasyna habarlasyp, qajetti psıhologııalyq kómek usyndy.

«Bala quqyǵyn buzatyn jaǵdaılarǵa jol berilmeıdi. Bul jaǵdaı balanyń qaýipsizdigi men quqyǵyn buzýdyń kórinisi. Balalardyń qaýipsizdigi basymdyqqa ıe bolýy tıis. Áýe kompanııasy aldymen reıske tirkelgen balalarǵa qamqorlyq tanytýy kerek edi», - delingen komıtet taratqan habarlamada.

Sondaı-aq, komıtet osy sekildi jaǵdaılardyń aldyn alý maqsatynda FlyArystan áýe kompanııasyna jáne Kólik mınıstrliginiń Azamattyq avıatsııa komıtetine tıisti sharalar qabyldaýdy talap ete otyryp, resmı hat joldaǵan.

Buǵan deıin habarlaǵanymyzdaı, FlyArystan kompanııasy elordada egizdiń syńaryn áýejaıda qaldyryp ketken.

Oral qalasynyń qos turǵyny, egizder – Záýre men Zere Amerıkadaǵy til mektebinen Astana arqyly keri ushyp shyqqan. Elordaǵa aman jetken qos jasóspirimniń biri Astana - Oral baǵytynda ushqan «FlyArystan» áýe kompanııasynyń ushaǵynan qalyp qoıǵan. Bul týraly egizderdiń anasy Jazıra Mýsına jeke áleýmettik paraqshasyna jazdy.