FlyArystan-nyń Qaraǵandydan Almatyǵa reısi iske qosyldy
QARAǴANDY. QazAqparat - Qaraǵandylyqtar Almatyǵa jaıly ushaqtarmen qoljetimdi baǵamen ushý múmkindigine ıe boldy. Búgin FlyArystan qazaqstandyq loýkosteri Qaraǵandyǵa alǵashqy reısin júzege asyrdy, dep habarlaıdy qazAqparat tilshisi.
«Arzan baǵamen ushý sekildi bul jańalyqty jergilikti halyq kópten kútken bolatyn. Bul álem boıynsha júzege asyrylyp jatqan tájirıbe. Endi bizde de Elbasynyń tapsyrmasy boıynsha AirAstana kompanııasy qurǵan FlyArystan loýkosteri paıda boldy. Osy qyzmet túri avıajolaýshylar úshin ýaqtyly iske asyryldy», - dedi Qaraǵandy oblysynyń ákimi Erlan Qoshanov.
Ol sonymen qatar áýejaıǵa deıin baratyn avtobýs marshrýtyn ashý jospary týraly habarlady.
Laýkoster-kompanııa bıletiniń eń tómengi baǵasy 6000 teńgeni quraıdy. Bul somaǵa ushý jáne bes kılogramm qol júgin tasymaldaýǵa ruqsat beriledi. Qajet bolǵan jaǵdaıda artyq júkke qosymsha aqy tólenedi.
Borttaǵy azyq-túlik pen sýsyndar da bólek baǵaǵa satyp alynady. AirAstana kompanııasynyń prezıdenti Pıter Fosterdiń aıtýynsha, baǵa turaqty. Sendvıch, kofe jáne toqashtar qaptamasy kiretin eki adamǵa arnalǵan keshen 2400 teńgeni quraıdy.
FlyArystan ushaqtary Almatydan Qaraǵandyǵa kún saıyn ushatyn bolady.
Qazir FlyArystan ıeliginde Airbus A320 markaly eki ushaq bar. Qyrkúıek aıynda ushaqtar sany tórtke deıin ulǵaıtylady, kelesi jyldyń sońynda olar toǵyz bolady, al 2021 jyldyń sońynda kompanııada 15 bort bolady dep josparlanýda.
Qazir loýkoster basshylyǵy bolashaq bazalardyń birin Qaraǵandy áýejaıynda ornalastyrý múmkindigin qarastyrýda. Bul ushý geografııasyn keńeıtýge múmkindik beredi. Keleshekte tek Almatyǵa ǵana emes, elimizdiń basqa qalalaryna da reıster jasalady dep kútilýde.
