Wizz Air top-menedjeri endi FlyArystan áýe kompanııasyn basqarady
ASTANA. KAZINFORM — 1 naýryzdan bastap FlyArystan bıýdjettik áýe kompanııasynyń prezıdenti laýazymyna Iohan Eıdhagenniń taǵaıyndalady.
— Air Astana kompanııalar toby 2026 jylǵy 1 naýryzdan bastap FlyArystan bıýdjettik áýe kompanııasynyń Prezıdenti laýazymyna Iohan Eıdhagenniń taǵaıyndalǵanyn habarlaıdy. Iohan Eıdhagen FlyArystan kompanııasyna Wizz Air áýe kompanııasynan aýysady, — delingen habarlamada.
Onda ol birqatar basshylyq qyzmet atqarǵan, sonyń ishinde sońǵy ýaqytta Abý-Dabı qalasynda Wizz Air kompanııasynyń basqarýshy dırektory qyzmetin atqardy. Wizz Air quramynda ol kadrlar jáne ESG jónindegi atqarýshy dırektor, sondaı-aq marketıng boıynsha atqarýshy dırektor laýazymdaryn da ıelengen. Wizz Air-ge kelgenge deıin ol shamamen on bes jyl boıy Nokia kompanııasynda ártúrli elderde basshylyq qyzmetterde eńbek etken.
Iohan Eıdhagen Rıchard Ledjerdiń ornyna keledi. Rıchard Ledjer Air Astana tobynda jańa basshylyq qyzmetke — seriktestikter men alıanstar jónindegi vıtse-prezıdenti laýazymyna taǵaıyndalady. China Southern Airlines jáne Air India áýe kompanııalarymen jýyrda jasalǵan kelisimderdi qosa alǵanda, kodsherıngtik seriktestikter toptyń halyqaralyq qyzmetin keńeıtýde mańyzdy ról atqarady. Rıchard osy baǵyttaǵy múmkindikterdi damytýǵa, óńirdiń iri naryqtaryna qoljetimdilikti qamtamasyz etýge jaýapty bolady.
— Iohannyń Wizz Air kompanııasyndaǵy kadrlardy basqarý, ESG jáne marketıng salalaryndaǵy basshylyq qyzmetterde jınaqtaǵan kópjyldyq tájirıbesi men bıýdjettik áýe kompanııalarynyń bıznes-modeli týraly tereń túsinigi FlyArystan-nyń joǵary ósý áleýetin tolyq iske asyrýyna jol ashady. Tehnologııalyq ınnovatsııalar FlyArystan úshin árdaıym qyzmet sapasyn arttyrýdyń, baǵa men jaılylyq arasyndaǵy tepe-teńdikti saqtaýdyń negizgi elementi bolyp keldi. Iohannyń jetekshiligimen bul baǵyt jańa serpin alyp, FlyArystan óńirde jáne odan tys óz pozıtsııasyn nyǵaıta túsetinine senim mol.
Seriktestikter men alıanstar jónindegi vıtse-prezıdent qyzmetine aýysatyn Rıchardqa alǵys bildiremiz. Ol bizdiń ósý strategııamyzdyń negizgi elementteriniń biri sanalatyn keńeıtilgen strategııalyq seriktestikterdi damytý jumystaryna jaýapty bolady.
Sáýir aıynda bas atqarýshy dırektor qyzmetine kirisetin Ibrahım jáne naýryz aıynda topqa qarjy jónindegi atqarýshy dırektor retinde qosylatyn Gonsalý Pıreshpen birge, Air Astana kompanııalar toby óziniń uzaq merzimdi damý strategııasyn tabysty júzege asyrýdy jalǵastyratynyna senimdimin, — dedi Air Astana kompanııasynyń bas atqarýshy dırektory Pıter Foster.
Aıta ketelik FlyArystan-ǵa qatysty tergeý bastalǵany týraly jazǵan edik.