FlyArystan-nyń 12 jasar qyzdy áýejaıda qaldyryp ketýi: kompanııa jaýapqa tartyla ma
ORAL. KAZINFORM — FlyArystan áýe kompanııasynyń 12 jasar qyzdy Astanadaǵy áýejaıda qaldyryp ketýine baılanysty qoldanystaǵy erejege ózgerister engizilýi múmkin.
Advokat Danılhan Shaǵataevtyń Instagram áleýmettik jelidegi paraqshasynda málim etkenindeı, ózderiniń aryzy boıynsha QR Kólik mınıstrligi Azamattyq avıatsııa komıtetinen jaýap alǵan.
«Komıtet bıylǵy 21 shildede Astana – Oral baǵyty boıynsha KS7367 reısine balany ótkizbegeni úshin FlyArystan áýe kompanııasyn ákimshilik jaýapkershilikke tartýǵa nıetti ekendigin habarlady. Osyǵan baılanysty komıtet pen «Qazaqstan avıatsııa ákimshiligi» AQ muqııat tekserý ótkizbekshi», deıdi D.Shaǵataev.
Sonymen qatar bolashaqta mundaı jaǵdaıǵa jol bermeý maqsatynda QR Investıtsııalar jáne damý mınıstriniń 2015 jylǵy 30 sáýirdegi № 540 buıryǵymen bekitilgen jolaýshylardy, bagajdy jáne júkterdi áýe kóligimen tasymaldaý qaǵıdalaryna túzetýler engizý máselesi qaralady.
«Budan buryn Jazıra Mýsınamen (qyzdyń anasy) birge FlyArystan kompanııasyna saıasatty ózgertip, balalardy tasymaldaý erejesine ózgerister engizýdi jazbasha túrde usyndyq. Atalǵan usynys Kólik mınıstrligi ókiliniń qatysýymen FlyArystan prezıdentimen ótken kezdesýde de aıtyldy», deıdi advokat.
Onyń aıtýynsha, balany áýejaıda qaldyryp ketý oqıǵasy birinshi ret bolyp otyrǵan joq. Eger bul joly áýe kompanııasy keshirim suraýmen shektelse, bolashaqta mundaı jaıǵa múldem jol bermeý qajet.
«Biz komıtet qaǵıdaǵa tıisti ózgerister jobasyn ázirlep, bul jýyq arada qabyldanady dep senemiz. Qoldanystaǵy erejege ózgerister engizilse, ol Qazaqstandaǵy barlyq áýe kompanııalaryna ortaq bolmaq», dedi D.Shaǵataev.
Eske sala keteıik, budan buryn FlyArystan áýe kompanııasynyń ata-anasyz qalǵan balany Astanada áýejaıda qaldyryp ketkenin jazǵan bolatynbyz.
Sondaı-aq FlyArystan basshysy Oralda egizderdiń anasy Jazıra Mýsınamen kezdesti.
