FlyArystan kompanııasynyń ushyp kele jatqan eki áýe kemesine qustar soǵyldy

ASTANA. QazAqparat – Qazaqstandaǵy loýkoster FlyArystan kompanııasynyń ushyp kele jatqan eki áýe kemesine qustar soǵyldy. Bul ushaqtar Túrkistan – Astana jáne Qostanaı – Astana baǵyty boıynsha saparǵa shyqqan, dep habarlaıdy QazAqparat tilshisi.

Bul aqparatty áýe kompanııasynyń baılanys ortalyǵy rastady. FlyArystan ókilderi osy oqıǵa saldarynan Astana – Qostanaı jáne Qostanaı – Shymkent baǵyty boıynsha basqa reıster keıinge shegerilgenin habarlady. Ushaqtardyń shyǵý ýaqyty saǵat 18:15-ke jáne 20:00-ge aýystyryldy.

«Bılet quny tolyq qaıtarylady nemese basqa kúnge qaıtadan bılet alýǵa bolady. Bul jumystar aqysyz iske asyrylady», - delingen FlyArystan baılanys ortalyǵy málimetinde.

Jaqynda FlyArystan ushaǵyna naızaǵaı túsip, áýe kemesi shuǵyl túrde qonýǵa májbúr boldy.