FlyArystan Qaraǵandy áýejaıynan baza ashady
QARAǴANDY. QazAqparat - FlyArystan otandyq loýkosteri Qaraǵandy áýejaıynda baza ashady, dep habarlaıdy Qaraǵandy oblysy ákimdiginiń baspasóz qyzmeti.
Ol kompanııanyń elimizdegi ekinshi bazasy bolmaq. Birinshisi Almatyda jumys isteıdi.
Áýe kompanııasynyń ushaqtary Qaraǵandyda, «Saryarqa» áýejaıynda ornalasady. Bul degenimiz, oblys ortalyǵynan ártúrli baǵyttar boıynsha, sonyń ishinde halyqaralyq baǵyttarda 12 reıs iske qosylady degendi bildiredi. Áýe kemesine qyzmet kórsetý jáne janarmaı quıý da Qaraǵandy áýejaıynyń bazasynda júzege asyrylady.
«Biz bazany 2020 jyldyń birinshi jartysynda ashýdy josparlap otyrmyz. Bastapqyda onda árqaısysy ekonom-klasty 180 orynǵa arnalǵan eki bort ornalasady. Marshrýttar áli anyqtalǵan joq. Baǵyttardy qaraǵandylyqtardyń tilekterin eskere otyryp tańdaǵymyz keledi. Usynystardy zertteý úshin Instagram-da arnaıy akkaýnt ashamyz», - dedi Air Astana AQ qarjy jónindegi basqarýshy dırektory Ibragım Jańlyel.
Onyń aıtýynsha, bazanyń ashylýy Qaraǵandyda 120 jańa jumys
ornyn qurýǵa múmkindik beredi. Áýe kompanııasy bortserikterdi, ushqyshtardy,
ınjenerler men jerdegi qyzmet kórsetý qyzmetkerlerin qabyldaıdy.
Qazir Qaraǵandy áýejaıynda angarlar jóndeledi jáne loýkoster
bazasyn ornalastyrýǵa daıyndyq boıynsha basqa da tehnıkalyq jumystar
júrgizilýde.
Esterińizge sala keteıik, Qaraǵandydan FlyArystan áýe kompanııasynyń alǵashqy reısi osy jyldyń ekinshi mamyrynda júzege asyryldy. Qazir áýe kemeleri Qaraǵandydan Almatyǵa jáne keri qaraı kúndelikti ushyp otyrady. Bılettiń eń tómengi baǵasy – 5 999 teńge. Bul somaǵa ushý jáne qol júgin tasymaldaý kiredi. Qosymsha aqy úshin jolaýshylarǵa bortta tamaq, bagaj tasymaldaý jáne basqa da qyzmetter usynylady.
