FlyArystan-da qarajat urlaý faktileri anyqtaldy

ASTANA. KAZINFORM — FlyArystan áýekompanııasynyń basshylyǵy qarajat urlaý faktilerin anyqtap, táýelsiz tergeý júrgizý úshin aýdıtorlyq kompanııaǵa júgindi. Bul týraly aqparatty Air Astana kompanııasynyń baspasóz qyzmeti taratty.

 — Tergeý nátıjeleri boıynsha urlyq faktileri rastaldy, osyǵan baılanysty áýekompanııa kináli adamdardy anyqtaý jáne materıaldyq zalaldy óteý úshin quqyq qorǵaý organdaryna júgindi. Kompanııa bul somany 9 aıdaǵy qarjylyq eseptilikte tolyq eskerdi. Tergeý múddesi úshin qosymsha egjeı-tegjeıler jarııa etilmeıdi. FlyArystan óz qyzmetinde alaıaqtyq pen zańsyzdyqqa múldem tózbeıdi, — delingen kompanııa habarlamasynda.

Buǵan deıin habarlaǵanymyzdaı, ushaqtardyń jıi keshigýine baılanysty QR Kólik mınıstrliginiń Azamattyq avıatsııa komıteti  Air Astana men FlyArystan kompanııalaryna jospardan tys tekserý júrgizetinin málimdedi.