FlyArystan bir aıda 50 myńnan astam jolaýshyny tasymaldady
NUR-SULTAN. QazAqparat - FlyArystan alǵashqy aıdaǵy operatsııalyq jumysynyń nátıjesin jarııalady, dep habarlaıdy QazAqparat Azamattyq avıatsııa komıtetiniń baspasóz qyzmetine silteme jasap.
Alǵashqy qazaqstandyq loýkoster 2019 jyldyń mamyr aıynda 50 myńnan astam jolaýshyny tasymaldady. Ótken aıda oryndalǵan reıster sany 309 bolsa, olardy ýaqytyly oryndaý kórsetkishi 94% jetti, al áýekemelerdiń júkteme koeffıtsenti 93% asyp tústi.
Áýekompanııa saıtynda 26 qazanǵa deıin ushýdy josparlaǵan jolaýshylar úshin bılet satylymy ashyq. Sol sebepti mamyrdyń sońyna deıin satylǵan 125 000-nan astam bıletterdiń 60% kóbi - birneshe aı buryn saparlaryn josparlap, keleshekte saıaxatty oryndaýdy jón kórip otyrǵan jolaýshylar sany ekenin atap ketken jón.
Esterińizge sala ketsek, qazaqstandyq loýkoster 30 mamyrdan bastap ońtústik astanadan Nur-Sultan, Taraz, Oral men Qaraǵandy shaharlaryna oryndalatyn reısterge qosa jańa Almaty-Pavlodar-Almaty jáne Almaty-Shymkent-Almaty baǵyttary boıynsha da qatynaı bastady.
