FlyArystan áýe kompanııasy 12 kúnde 16 myńǵa tarta bılet satqan
NUR-SULTAN. QazAqparat - QR Indýstrııa jáne ınfraqurylymdyq damý mınıstri Roman Sklıar FlyArystan otandyq loýkosteriniń qyzmeti týraly aıtyp berdi, dep habarlaıdy QazAqparat tilshisi.
«Búginde FlyArystan ataýymen málim jańa bıýdjettik áýe kompanııasy 12 kúnde 16 myńǵa tarta bılet satyp úlgerdi. Atalǵan kompanııanyń qyzmetine suranys óte joǵary», - dedi mınıstr.
Onyń paıymdaýynsha, 1 mamyrdan bastap bıylǵy jyldyń sońyna deıin FlyArystan 1 mıllıonǵa jýyq jolaýshyny tasymaldaýy múmkin.
«Bılet quny ulttyq áýe tasymaldaýshylarmen salystyrǵanda kem degende eki esege arzan. Eksperıment túrinde Azamattyq avıatsııa komıtetiniń tóraǵasy meniń kózimshe Nur-Sultannan Almatyǵa jáne keri baǵytta elektrondyq formatta 15 myń teńgege bılet satyp aldy», - dedi R. Sklıar.
Budan buryn habarlanǵandaı, Qazaqstannyń birinshi loýkosteri FlyArystan kompanııasy Almaty men Nur-Sultan qalalarynyń arasyndaǵy turaqty baılanysty 1 mamyrda ashady. Qos qala arasyndaǵy kúndelikti áýe qatynasyn syıymdylyǵy 180 oryndyq, zamanaýı reaktıvti Airbus A320 ushaqtary qamtamasyz etedi. Bir jaqqa bılet quny áýejaı alymdarymen qosa eseptegende 6999 teńgeden bastalady.
