Áýekompanııa salǵyrttyǵy: FlyArystan egizdiń syńaryn áýejaıda qaldyryp ketken
ASTANA. KAZINFORM – Oral qalasynyń qos turǵyny, egizder – Záýre men Zere Amerıkadaǵy til mektebinen Astana arqyly keri ushyp shyqqan. Elordaǵa aman jetken qos jasóspirimniń biri Astana - Oral baǵytynda ushqan «FlyArystan» áýekompanııasynyń ushaǵynan qalyp qoıǵan. Bul týraly egizderdiń anasy Jazıra Mýsına óziniń áleýmettik paraqshasyna jazdy.
Anasynyń aıtýynsha, 12 jasar balalar 20 shilde kúni senip tapsyrylǵan tulǵanyń jetekshiligimen Nıý-Iork qalasynan Astanaǵa baǵyt alǵan ushaqpen ushyp kelgen. 21 shilde kúni tańda ushaq Astana qalasyna qonǵan. Jospar boıynsha sol kúni tústen keıin Oralǵa ushatyn reıske otyrýy tıis bolǵan. Alaıda, «FlyArystan» áýekompanııasy qyzmetkerleriniń salǵyrttyǵy saldarynan, egizderdiń bireýi áýejaıda qalyp qoıǵan.
«FlyArystan» áýekompanııasynyń qyzmetkerleri tek Záýreni tirkep, tehnıkalyq aqaýdy syltaýratyp, Zereni tirkemegen. Balalarǵa jaýapty tulǵaǵa Zereni ózderi ushaqqa otyrǵyzatynyn aıtqan. Nátıjesinde bári ushyp ketedi de, Zere áýejaıda qalyp qoıǵan», — dep jazdy anasy.
Zere osylaısha, eki chemodany men qujatyn qushaqtap, Astana áýejaıynda jalǵyz qalǵan.
Anasynyń habarlaýynsha, bul jańalyqty estigen boıda ol tıisti mekemelerge qońyraý shalyp, habarlasa bastaǵan. Áýekompanııasy Zereni qonaqúıge ornalastyrý týraly usynys aıtqan. Alaıda, qyzynyń qaýipsizdigine alańdaǵan ana usynystan bas tartyp, týysqandarynan kómek suraǵan. Erteńinde tańda Zere eshbir jetelegen adamsyz ózi Oralǵa ushqan.
Jazıra Mýsına birden qorǵaýshy taýyp, Azamattyq avıatsııa komıtetine shaǵym túsirgen. Bala quqyǵy, áýekompanııanyń jaýapkershiligi máselesin alǵa tartqan.
Búgin «FlyArystan» áýekompanııasy kámeletke tolmaǵan jolaýshyny reıske jibermeý jónindegi aqparatqa qatysty túsinikteme berdi.
«Azamattyq avıatsııa komıteti «FlyArystan» avıakompanııasyn kámeletke tolmaǵan jolaýshyny avıakompanııanyń reısine jibermegeni úshin ákimshilik jaýapkershilikke tartady. Bul óreskel jaǵdaı. Jolaýshylardyń quqyǵy árqashan múltiksiz saqtalýy kerek. Azamattyq avıatsııa komıteti, «Qazaqstannyń avıatsııalyq ákimshiligi« AQ-men birlese «FlyArystan» avıakompanııasyna qatysty jan-jaqty tekserý júrgizedi. Kináli qyzmetkerler mindetti túrde jaýapqa tartylady», — delingen habarlamada.
