FlyArystan áýe bıletterin satý kezinde tranzaktsııa úshin komıssııa alyp otyrǵan

ASTANA. KAZINFORM — Básekelestikti qorǵaý jáne damytý agenttigi «FlyArystan» áýe bıletterine qun qoıý kezinde zań buzǵanyn anyqtady. 

Monopolııaǵa qarsy organ «FlyArystan» áýe tasymaldaýshysy tarapynan ústem jaǵdaıdy teris paıdalaný belgilerin anyqtady. Taldaý barysynda avıabıletterdiń quny brondaýdyń ártúrli kezeńderinde avtomatty túrde qosylatyn jasyryn qosymsha aqylar esebinen óskeni anyqtaldy.

— Avıatasymaldaýshy áýe bıletterin satý kezinde tranzaktsııa úshin komıssııa alý arqyly áýe bıletiniń qunyn arttyrǵan. Bul «drip pricing» dep atalady, demek, «tamshylap baǵa ósirgen». Negizinen eýropalyq zańnamada buǵan múldem tyıym salynǵan. Osy faktilerdi biz anyqtap, avıatasymaldaýshyǵa qatysty monopolııaǵa qarsy zańnamany buzýdy toqtatý týraly habarlama joldadyq. Ol keıinnen oryndaldy, — dedi Básekelestikti qorǵaý jáne damytý agenttiginiń Tóraǵasy Marat Omarov BQDA alqa otyrysynda.

Qazirgi ýaqytta Agenttik ishki avıatasymaldar naryǵyna qatysty monopolııaǵa qarsy taldaý júrgizilip jatyr. 

Eske sala keteıik, buǵan deıin ushaqtardyń jıi keshigýine baılanysty Air Astana men FlyArystan kompanııalaryna jospardan tys tekserý júrgizilgenin jazǵan bolatynbyz.