FlyArystan: Almatydan Nur-Sultanǵa ushaq bıletteri 6999 teńgeden bastalady
NUR-SULTAN. QazAqparat - Qazaqstannyń birinshi loýkosteri FlyArystan kompanııasy Almaty men Nur-Sultan qalalarynyń arasyndaǵy turaqty baılanysty 1 mamyrda ashady, dep habarlaıdy QazAqparat.
Qos qala arasyndaǵy kúndelikti áýe qatynasyn syıymdylyǵy 180 oryndyq, zamanaýı reaktıvti Airbus A320 ushaqtary qamtamasyz etedi. Bir jaqqa bılet quny, áýejaı alymdarymen qosa eseptegende 6999 teńgeden bastalady.
2 sáýirden bastap jolaýshylar bıletti www.flyarystan.com saıtynda brondaýmen qatar, borttyq taǵamǵa tapsyrys berý, joljúkti satyp alý, prıorıtetti otyrǵyzý syndy qyzmet túrlerin qosymsha ala alady.
«Atalmysh baǵdar, otandastarymyz asyǵa kútken reısterdiń biri bolatyny sózsiz. Budan bylaı 2 saǵattan kem ýaqyt ishinde, nebári 6999 teńgege dittegen jerine kásipkerlermen qatar, qarapaıym stýdentter de ata-analaryna, týǵan-týysqandaryna tez, ári jeńil jete alatyny bizdi asa qýantady. Conymen qatar, keń-baıtaq Qazaqstannyń soltústik pen ońtústik óńirlerin rahattanyp tamashalap, jergilikti týrızmniń damýyna yqpalyn tıgizedi dep kámil senemiz», - deıdi FlyArystan-nyń satý jáne marketıng bóliminiń dırektory Janar Jaılaýova.
FlyArystan barsha jolaýshylarǵa flyarystan.com resmı saıtta jarııalanǵan tarıf erejelerimen muqııat tanysýǵa keńes beredi.
