FlyArystan: Almaty - Shymkent baǵytyndaǵy áýe bıletteri 5 myń teńgeden bastalady

NUR-SULTAN. QazAqparat - Qazaqstannyń alǵashqy loýkosteri FlyArystan Almatydan Shymkent pen Pavlodarǵa bılet sata bastady. Atalmysh baǵyttar boıynsha tolyq tehnıkalyq tekseris pen salony rekonfıgýratsııadan ótken, 180 oryndyq Airbus A320 áýelaınerleri kúndelikti qatynaıtyn bolady, dep habarlaıdy QazAqparat kompanııanyń baspasóz qyzmetine silteme jasap.

«Ońtústik astanadan shyraıly Shymkentke deıin jol júrý uzaqtyǵy - 1 saǵat 20 mınýt. Qos qala arasyndaǵy birjaqty qatynaý quny 4999 teńgeden bastalady. Pavlodarǵa bılet quny barlyq áýejaı alymdarymen qosa eseptegende 6999 teńgeden bastalyp, ol jaqqa jolaýshylar 1 saǵat 50 mınýtta jete alady. Bıletterdi www.flyarystan.com saıtynan brondap, oǵan qosa jolaýshylar óz qalaýymen qosymsha júk borttyq taǵamǵa tapsyrys berý, prıorıtetti otyrǵyzý syndy qyzmet túrlerine tapsyrys bere alady» delingen habarlamada.

Almatydan Nur-Sultan, Taraz, Oral men Qaraǵandyǵa qatynaıtyn reıster birinshi mamyrdan bastap oryndala bastasa, kópten kútken Shymkent pen Pavlodarǵa qatynaý 30 mamyrda bastalady.

«Shymkent pen Pavlodar kezdeısoq tańdalǵan joq. Birinshisi - ońtústik óńiridiń bas qalasy ekeni sózsiz. Odan jáne oǵan kúndelikti júzdegen adam sapar shegedi. Almaty-Shymkent-Almaty baǵyty - áýe jolaýshylarynyń kópten kútken baǵdary. Al Pavlodar men Almatynyń arasynda qonaqqa baryp-keletin jolaýshylar, kásipkerlermen qatar, soltústik-shyǵys óńiriniń kórki - Baıanaýyl eldi mekenin kórgisi keletin týrıster de barshylyq ekenin eskergen jón. FlyArystan usynyp otyrǵan arzan baǵamen bıletti brondap alatyn otandastar sany kóp bolyp, olar tıimdi tarıfti bıletterdi alyp úlgeredi degen senimdemiz. Sebebi arzan baǵaly oryndar ádette tez satylyp ketetinin eskergen jón», - deıdi FlyArystan-nyń satý jáne marketıng bóliminiń dırektory Janar Jaılaýova.

FlyArystan barsha jolaýshylarǵa tarıf erejelerimen muqııat tanysyp, tolyq aqparatty resmı saıttan alýǵa keńes beredi.