FlyArystan Almaty men Samarqan arasyndaǵy reıs nege ushpaı qalǵanyn túsindirdi

NUR-SULTAN. QazAqparat - FlyArystan áýe kompanııasy Almaty-Samarqan reısi nege ushpaı qalǵanyn túsindirdi, dep habarlaıdy QazAqparat.

Eske sala keteıik, FlyArystan bıýdjettik áýekompanııasy Almaty-Samarqan jańa baǵytyna bılet sata bastaǵan bolatyn.

Turaqty reıster 30 naýryzdan bastap ár sársenbi men senbi saıyn oryndalady, saıahat shamamen eki saǵatqa sozylady dep josparlanǵan.

Ókinishke qaraı, Ózbekstannyń áýe basshylyǵy qazaqstandyq kompanııa joldaǵan ótinishke ruqsat bermegen.

Osyǵan baılanysty 6 sáýirge josparlanǵan reıs ushpaıdy.

«Bıletterdiń tolyq quny qaıtarylady nemese ony aptasyna eki márte qatynaıtyn Túrkistan-Tashkent reısiniń bıletine aýystyrýǵa bolady. Budan keıin jaǵdaı ózgerip jatsa, kompanııa jolaýshylardy habardar etedi» delingen habarlamada.

Keleshekte FlyArystan eki el arasyndaǵy memleketaralyq mámileni keńeıtip, Ózbekstanǵa reıster kestesin nyǵaıtýǵa bolatynyna úmittenip otyr.

FlyArystan-nyń halyqaralyq baǵyt júıesi Qazaqstannan Túrkııa, BAÁ, Grýzııa, Qyrǵyzstan, Reseı men Ózbekstanǵa qatynaıtyn turaqty reısterden turady.

2022 jyldyń sáýirinen bastap olardyń qataryna Ázerbaıjanǵa qatynaıtyn jańa reıster kiredi.