FlyArystan Aqtaý – Dýbaı baǵyty boıynsha reısterdi 31 naýryzǵa deıin toqtatty
ASTANA. KAZINFORM – Taıaý Shyǵystaǵy turaqsyz jaǵdaıǵa jáne óńirde engizilgen shekteýlerge baılanysty FlyArystan áýe kompanııasy Aqtaý – Dýbaı – Aqtaý baǵyty boıynsha reıster kestesine ózgerister engizdi.
Ushý qaýipsizdigin qamtamasyz etý jáne qalyptasqan jaǵdaıdy eskere otyryp, atalǵan baǵyttaǵy reıster 2026 jylǵy 31 naýryzdy qosa alǵanda ýaqytsha toqtatylady. Buǵan deıin reıster aptasyna eki ret – seısenbi jáne senbi kúnderi oryndalyp kelgen.
Kúshi joıylǵan reısterdiń jolaýshylaryna bıletterdi satyp alǵan orny boıynsha áýebılet quny tolyq kólemde aıyppulsyz qaıtarylady nemese sapardy keıingi kúnderge tegin qaıta brondaý múmkindigi usynylady.
Áýekompanııa óńirdegi jaǵdaıdyń damýyn muqııat baqylaýdy jalǵastyrýda jáne avıatsııalyq bılik organdarymen ári basqa da tıisti qurylymdarmen turaqty baılanysta jumys júrgizip jatyr.
Kúshi joıylǵan reısterge qatysty barlyq suraq boıynsha jolaýshylar FlyArystan áýekompanııasynyń resmı arnalary arqyly qoldaý qyzmetine habarlasa alady: baılanys ortalyǵy (qońyraýlar jáne WhatsApp), sondaı-aq saıttaǵy jáne mobıldi qosymshadaǵy onlaın-chat arqyly.
Eske sala keteıik, buǵan deıin Astana áýejaıynan Almaty, Qostanaı jáne basqa qalalarǵa ushatyn 20 reıs keıinge shegerilgenin jazǵanbyz.