FlyArystan 2022 jyly jolaýshylar sanyn 4 mıllıonǵa jetkizýdi kózdep otyr
NUR-SULTAN. QazAqparat - FlyArystan áýe kompanııasy 2022 jyly 4 mln adamǵa deıin jolaýshy tasymaldaıtyn bolady. Bul týraly atalǵan áýe kompanııasynyń marketıng jáne satý bóliminiń dırektory Janar Jaılaýova málim etti, dep habarlaıdy QazAqparat tilshisi.
«Búginnen bastap Qazaqstan ishinde 6 baǵyt boıynsha áýe reısteri ushyryla bastady. Reıster sanyn kóbeıtý úshin óńirlerdegi áýejaılarǵa hat joldap jatyrmyz. Bizde qazir nebári 2 ushaq áýe reısterin oryndap jatyr, qyrkúıek aıynda taǵy bir ushaq qosylady. Sondyqtan qaı óńirdiń áýejaıy ótinim beredi, sol baǵytqa qaraı reıs ashylady. Al jolaýshylardyń sanyna kelsek, bıyl jospar boıynsha FlyArystan áýe kompanııasynyń qyzmetin qoldanýshylardyń sany 700 myń adam bolady dep belgilep otyrmyz. Kelesi 2020 jyly 2,5 mln adam, al 2022 jyly 4 mln adamǵa jetkizemiz», - dedi J.Jaılaýova.
FlyArystan áýe kompanııasy ókiliniń málimetinshe, búgingi kúnge deıin 45 myńǵa jýyq bılet satyldy jáne olardyń 85% «bagajsyz» tarıfter quraıdy.
«Búgingi 180 oryndyq Airbus A320 ushaǵymen Almatydan Nur-Sultan áýejaıyna alǵashqy reıs sátti oryndaldy. Ushaqta sapaly qyzmet kórsetiledi jáne bılet baǵasy da qoljetimdi. Sonymen qatar FlyArystan áýe kemesiniń bortynda jańa Recaro 3530 SLIM bylǵarymen qaptalǵan, 70 sm-den 82 sm-ge deıin qozǵalatyn oryndyqtar ornatylǵan. Odan bólek, 2020-2021 jyldary jaqyn shet elderde áýe qatynasyn júzege asyrý josparymyzda bar. Atap aıtqanda, Reseı, Grýzııa, Ózbekstan jáne taǵy basqa elder», - deıdi bólim basshysy.
Aıta keteıik, búgin FlyArystan áýe kompanııasynyń alǵashqy áýe reısi Almaty qalasynan elordaǵa ushyp keldi.
