«Fly Dubai» kompanııasy Dýbaı-Shymkent áýe reısiniń nelikten toqtap qalǵanyn túsindirdi

NUR-SULTAN. QazAqparat - «Fly Dubai» áýe kompanııasy Dýbaı-Shymkent-Dýbaı reısiniń nelikten oryndalmaǵanyn túsindirdi. Bul jaıynda QR IIDM Azamattyq avıatsııa komıteti Feısbýktegi paraqshasynda jazdy, dep habarlaıdy QazAqparat tilshisi.

«Fly Dubai» áýe kompanııasynyń aqparatyna sáıkes, 2019 jylǵy 2 sáýirde áýe kompanııasynyń Dýbaı-Shymkent-Dýbaı baǵytyndaǵy FZ 738/739 reısi Shymkent qalasynyń halyqaralyq áýejaıynan 2019 jylǵy jazǵy navıgatsııaǵa arnalǵan slotty naqtylaýdyń bolmaýy sebebinen oryndalmaǵan», - delingen taratylǵan aqparatta.

Vedomstvo málimetinshe, atalǵan reıstiń barlyq jolaýshylary qonaq úıge ornalastyryp, ystyq tamaqpen qamtamasyz etilgen.

«Dýbaıdan ushyp ketetin barlyq jolaýshylar Shymkentke reısti Nur-Sultan, Almaty, Bishkek jáne Tashkent arqyly qaıta brondady. Shymkentten ushyp kelmegen jolaýshylarǵa qonaq úı jáne basqa qalalar arqyly ushý múmkinshiligi usynyldy. «Fly Dubai» áýe kompanııasy kelip túsken suranystarǵa baılanysty týrıstik operatordyń BAÁ-de bolýyna qatysty qosymsha shyǵyndaryn óteıdi», - dep atap ótedi komıtetten.

Biz buǵan deıin Dýbaı áýejaıynda 80 qazaqstandyqtyń elge ushatyn reısten túsirilgenin habarlaǵan edik.