Fly Arystan ushaq parki 2 áýe kemesimen tolyǵady
NUR-SULTAN. QazAqparat - Búgin QR IIDM Azamattyq avıatsııa komıtetiniń tóraǵasy Talǵat Lastaev Fly Arystan áýe kompanııasynyń basshysy Tım Djordanmen kezdesti. Bul jaıynda atalǵan komıtettiń Telegram paraqshasynda jarııalandy, dep habarlaıdy QazAqparat tilshisi.
«Kezdesýde tasymaldaýshynyń operatsııalyq qyzmetiniń aralyq qorytyndysy men odan ary damý jospary talqylandy. Loýkoster iske qosylǵan sátten bastap 200 myńnan astam bılet, onyń 50 paıyzdan astamy 10 myń teńgeden tómen baǵaǵa satyldy. Barlyq baǵdardaǵy ortasha júkteme 90 paıyzdan asyp jyǵylady. Júktemesi eń joǵary baǵdarlar Nur-Sultan-Almaty jáne Almaty-Oral baǵyttary bolyp otyr. Ótken kezeń ishinde oryndalǵan tasymaldaýdyń dáldigi ortasha eseppen 90 paıyzdan asyp túsedi», - delingen komıtet aqparatynda.
Qazirgi ýaqytta áýe kompanııasy Eırbas-320 úlgisindegi 2 áýe kemesin paıdalanady. Kompanııa josparyna sáıkes osy jyldyń 4-toqsanynda qosymsha 2 ushaq keledi. Boljamǵa sáıkes, Qazaqstandaǵy áýe ushaǵymen jolaýshylar tasymaldaý naryǵynyń qarqyndy damýynyń arqasynda Fly Arystan 2020 jyly álemdegi eń jyldam damýshy kompanııalardyń birine aınalmaq.
