Fly Arystan-ǵa áýe reısi keshikkeni úshin 3 mln teńge aıyppul salyndy

NUR-SULTAN. QazAqparat – Azamattyq avıatsııa komıteti áýe reısteriniń keshigýine baılanysty júrip jatqan tergeýdiń barysy týraly aqparat jarııalady, dep habarlaıdy QazAqparat tilshisi.

«Azamattyq avıatsııa komıteti reısterdi keshiktirý áýe tasymaldaýshylaryn jolaýshylardyń quqyqtaryn buzǵany úshin jaýapkershilikke tartý isin jalǵastyrýda. 2022 jyldyń 16 shildesinde «Eır Astana» kompanııalar tobyna kiretin «Fly Arystan» bólimshesi Almaty-Atyraý baǵyty boıynsha KS-7202 reısin 12 saǵat 9 mınýtqa keshiktirgeni anyqtaldy. Al ushaqty osynsha ýaqyt boıy kútken jolaýshylarǵa QR áýe keńistigin paıdalaný jáne avıatsııa qyzmeti týraly zańnyń 86-babynyń 1-bóliginde kózdelgen qyzmetter, atap aıtqanda, qonaq úı usyný qyzmetteri tıisinshe usynylmaǵan», - dep jazylǵan komıetettiń baspasóz qyzmeti taratqan málimette.

Osylaısha, áýe kompanııasyna 4 tamyzda Ákimshilik quqyq buzýshylyq týraly kodekstiń 567-babynyń 2-bóligi boıynsha 1 000 AEK (3 063 000 teńge) aıyppul salynǵan.

«Bul «Eır Astana» tobyn áýe reısine jolaýshylardyń quqyǵyn buzǵany úshin ótken aıda salynǵan tórtinshi aıppyul», – deıdi Azamattyq avıatsııa komıtetiniń tóraǵasy Talǵat Lastaev.

Buǵan deıin Air Astana kompanııalar tobyna jyl basynan beri reıs keshiktirip, jolaýshylar quqyǵyn buzǵany úshin 9 mln teńge aıyppul salynǵanyn habarlaǵanbyz.