Fly Arystan áýe kompanııasyna qatysty tergeý júrip jatyr
ASTANA. KAZINFORM – Atalǵan áýe kompanııasynyń bılet baǵasyn negizsiz kótergeni anyqtalǵan jaǵdaıda ákimshilik aıyppul salynady. Bul týraly Básekelestikti qorǵaý jáne damytý agenttigi tóraǵasynyń orynbasary Bolat Sámbetov málim etti.
- Jýyrda FlyArystan áýe kompanııasyna qatysty monopolııalyq joǵary baǵa máselesi boıynsha tergeý júrgizýdi bastadyq. Qazir tergeý júrip jatyr, eger zańbuzýshylyqtar anyqtalsa, tıisti sharalar qabyldanady, - dedi Bolat Sámbetov Senat qabyrǵasynda ótken is-sharada.
Agenttik ókiliniń málimdeýinshe, atalǵan kompanııaǵa qatysty tergeý buǵan deıin de júrgizilgen.
- Monopolııalyq joǵary baǵa degenimiz – belgili bir baǵyt boıynsha, mysaly, Almaty nemese Shymkentke bılet baǵasynyń basqa kompanııalarǵa qaraǵanda aıtarlyqtaı joǵary bolýy. Biz aldymen kompanııanyń naryqta ústemdik etý faktoryn anyqtaımyz, ıaǵnı onyń ádil básekege áser etý múmkindigin baǵalaımyz. Eger kompanııa naryqta ústemdik etip, negizsiz joǵary baǵa belgilegeni anyqtalsa, onda monopolııalyq joǵary baǵa bolyp sanalady, - deıdi ol.
Sondaı-aq básekelestikti qorǵaý agenttigi basshysynyń orynbasary zańbuzýshylyq anyqtalǵan jaǵdaıda qandaı jaýapkershilik qarastyrylatynyn aıtty.
- Anyqtalǵan jaǵdaıda ákimshilik aıyppul salynady. Aıyppul aınalymnyń 5%-yn quraıdy, sondaı-aq negizsiz baǵa aıyrmasy tárkilenedi. Sonymen qatar, kompanııaǵa baǵany tómendetý týraly nusqama beriledi, - dep tolyqtyrdy B. Sámbetov.
Aıta ketsek, Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn iske asyrý sheńberinde Senatta «Qazaqstan Respýblıkasynda azamattyq avıatsııany damytý» taqyrybyna arnalǵan dóńgelek ústel ótti.
Eske sala keteıik, byltyr Kólik mınıstri Marat Qarabaev Fly Arystan bıletteriniń qymbattaýyna qatysty túsinik bergen edi.
Odan bólek, 2023 jyly Fly Arystan áýe kompanııasynyń 3 myńnan astam balaǵa jeńildik jasamaı, bıletti 50% qymbatqa satqany anyqtalǵan edi.
FlyArystan áýe kompanııasy byltyr qańtarda Air Astana-dan bólinip shyqty.