Florıdada Trampqa jasalǵan qastandyqqa qatysty sot protsesi qyrkúıekke aýystyryldy
ASTANA.KAZINFORM — Florıdanyń ońtústiginde Donald Trampqa qastandyq jasamaq boldy dep aıyptalǵan Raıan Rýt 2025 jyldyń qyrkúıeginde sot aldynda jaýap beredi, dep habarlaıdy «Amerıka daýysy».
Raıan Rýttyń qorǵaýshylary oǵan qarsy dáleldemelerdi tekserýge ýaqyt qajet ekenin aıtty. Raıan Rýttyń soty buǵan deıin josparlanǵan 10 aqpanda emes, 8 qyrkúıekte bastalady, dep habarlady federaldy okrýg sýdıasy Aılın Kennon dúısenbi kúni jarııalanǵan sheshimde.
Gavaıı turǵyny 58 jastaǵy Rýt óz kinásin moıyndamady. Onyń advokattary sýdıadan sot protsesin kelesi jeltoqsanǵa qaldyrýdy surap, oǵan qarsy dáleldemelerdi qarap shyǵýǵa ýaqyt qajet ekenin aıtty.
Qorǵaýshy Rýttyń 17 uıaly telefony jáne basqa da kóptegen elektrondy qurylǵylary bolǵanyn atap ótti. Sonymen qatar, qorǵaýshylarǵa polıtsııanyń keýde kameralary men qaýipsizdik kameralarynan túsirilgen júzdegen saǵattyq beınejazbalar berilgen.
Óz qaýlysynda Kennon aıyptaýlardyń aýyrlyǵyn eskere otyryp, ol kóbirek ýaqyt bergisi keletinin, biraq protsestiń bastalýyn 2025 jyldyń jeltoqsanyna aýystyrý shamadan tys kóp bolatynyn atap ótti. Bul rette sot otyrysyn qyrkúıekke taǵaıyndaý durys sheshim boldy.
Eske sala keteıik, buǵan deıin AQSh-tyń Pensılvanııa shtatynda saılaýaldy aktsııa ótip jatqan kezde Donald Trampqa qastandyq jasalǵanyn jazǵan bolatynbyz.