Florıdada Tramp pen Zelenskııdiń kezdesýi ótti

ASTANA. KAZINFORM — Ýkraına prezıdenti Vladımır Zelenskıı jeksenbi kúni Florıda shtatyna AQSh prezıdenti Donald Tramppen kezdesý úshin keldi. Kezdesýdiń basty maqsaty — Reseımen qaqtyǵysty toqtatý jónindegi jospardy talqylaý, dep habarlaıdy Kazinform agenttiginiń menshikti tilshisi.

Donald Tramp pen Vladımır Zelenskıı Tramptyń Mar-a-Lago rezıdentsııasynda bir-birimen amandasqannan keıin, kelissóz bastalmas buryn jýrnalısterdiń suraǵyna jaýap berdi.

Tramp «kelisim jasaýǵa alǵyshart bar» ekenin aıtyp, Reseı de, Ýkraına da berik ári turaqty beıbitshilik ornatýǵa óte baıypty túrde nıetti ekenin málimdedi.

Al Zelenskıı búgingi kezdesý 20 tarmaqtan turatyn jospardy ilgeriletýge arnalǵanyn aıtyp, onyń aıasynda aýmaqtyq ymyralar jasaý múmkindigi de talqylanatynyn jetkizdi.

Kezdesýden keıin eki lıder eýropa elderiniń basshylarymen telefon arqyly sóılesedi dep josparlanǵan. Sonymen qatar Tramp kelissózderdi jalǵastyrý úshin Reseı prezıdenti Vladımır Pýtınge de qońyraý shalatynyn aıtty.

Jýrnalısterge Mar-a-Lago rezıdentsııasynda ótip jatqan ekijaqty kezdesý zalyna qysqa ýaqytqa kirýge ruqsat berildi.

Bul kezdesý Tramp ótken aıda alǵash ret usynǵan 28 tarmaqtan turatyn bastapqy beıbitshilik josparynyń olqylyqtaryn joıýdy kózdeıdi. Keıin Ýkraına bul qujatty qaıta qarap, ony 20 tarmaqqa deıin qysqartqan. Qazirgi tańda amerıkalyq ókilder Ýkraına men Reseıdiń ekeýine de qolaıly bolatyn beıbit kelisimdi ázirleý baǵytynda qarqyndy jumys júrgizip jatyr.

Buǵan deıin Eýroodaq elderiniń kóshbasshylary men Zelenskıı Tramppen kezdesýdiń aldynda beınebaılanys arqyly kelissóz ótkizgeni habarlanǵan bolatyn.

Sondaı-aq Tramp Zelenskıımen kezdeser aldynda Reseı prezıdenti Vladımır Pýtınmen de telefon arqyly tildesti.