Florıdada «Mılton» daýylynan kem degende 4 adam qaza tapty
ASTANA. KAZINFORM – Shtat gýbernatory Ron Desantıstiń aıtýynsha, Florıdada túnde bolǵan daýyl saldarynan keminde tórt adam qaza tapqan. Tabıǵat apatynan Spanish Lakes Country Club qarttar úıi qırady, dep habarlaıdy BILD.
«Biz zalaldyń naqty kólemin erteń biletin bolamyz. Daýyl óte qatty, biraq biz oılaǵandaı, biz kútkendeı joıqyn bolǵan joq», - dedi Desantıs.
Daýyldyń maksımaldy tolqyny shamamen 3 metrge jetti. Buǵan deıin qyrkúıek aıynyń sońynda soqqan joıqyn «Helen» daýyly teńiz sýynyń deńgeıin 4,5 metrden astamǵa bıiktikke deıin kótergenin aıta keteıik. Bul jolǵy «Mılton» da jaýyn-shashynnyń kóp mólsherin ózimen birge ala keldi. Atap aıtar bolsaq, Sent-Pıtersbergte bir sharshy metrge 460 lıtrge deıin jaýyn túsken.
Daýyl Florıdadaǵy qýat kózderin ajyratty. Qazirgi kezde 3,2 mln adam jaryqsyz otyr. Shtattaǵy kóptegen úı zaqymdanǵan, qıraǵan. Sent-Pıtersbergte jelden jergilikti beısbol stadıonynyń shatyry julynyp, oǵan jaqyn jerde kótergish kran qulaǵan.
Buǵan deıin AQSh-ta 5 mln-ǵa jýyq adam evakýatsııalaý týraly buıryq alǵany habarlanǵan bolatyn.
Florida State University, University of Florida, University of South Florida jáne University of Miami-de bilim alyp júrgen qazaqstandyq stýdentter úıinde otyr. Oqý oryndary ýaqytsha jabylyp, oqý protsesi toqtatyldy.
Halyqaralyq baǵdarlamalar ortalyǵy «Mılton» daýylynyń Florıdaǵa jaqyndaǵanyna baılanysty jaǵdaıdy baqylap otyr.
