Florıdada koronavırýs juqtyrýdyń táýliktik rekordy tirkeldi
TALLAHASSI. QazAqparat – AQSh-tyń Florıda shtatynda bir táýlikte koronavırýs juqtyrǵan 15 299 adam tirkeldi. Bul rekordtyq kórsetkish, dep habarlaıdy QazAqparat CNN arnasyna silteme jasap.
Bul birneshe mıllıon turǵyny bar elde sońǵy 24 saǵatta tirkelgen COVID-19 juqtyrý oqıǵasynyń tórtten biri. AQSh turǵyndarynyń 7%-y qonystanǵan Florıda buǵan deıin Kalıfornııa shtatynda tirkelgen antırekordty jańartty. Sonymen qatar, shtatta ótken táýlikte 45 adam koronavırýstan kóz jumdy. Karantın sharalary mamyrda alynǵan shtatta týrıster aǵyny men qart adamdardyń kóptigi jańa vırýstyń táýliktiń ósiminiń kúrt kóbeıip ketýine sebep boldy.
Florıdamen qatar, Tehas, Djordjııa jáne Arızona shtattarynda da koronavırýsqa shaldyqqandar sany birden artqan. Kóptegen shtat bar, sport zaldary, shashtaraz ben basqa da mekemelerdi ashqannan soń 2 aıdan keıin vırýs juqtyrý oqıǵalary kóbeıe bastady. Elde orta eseppen kúnine 60 000 adam ınfektsııaǵa shaldyǵady.
Qarqyndy terapııa bóliminiń tolyp qalǵany, medıtsına qyzmetkerlerine arnalǵan qorǵanys quraldary men Covid-19-dyń bar-joǵyn anyqtaıtyn test jetispeýshiligi máseleleri týraly aıtylýda.
Keı shtat gýbernatorlary men amerıkalyq qalalardyń merleri karantınnen shyǵýdy toqtatyp nemese kesheýildetip jatyr. Pandemııadan bolǵan ekonomıkalyq jáne áleýmettik zalal uzaqqa sozylýy múmkin. Keıingi málimet boıynsha, myńdaǵan amerıkalyq azamat jumyssyz qalýy múmkin.
