Florıda jaǵalaýynda Meksıkaǵa baǵyt alǵan ushaq muhıtqa qulady
ASTANA. 20 qarasha. QazAqparat - Bortynda tórt adamy bar jeńil motorly ushaq Amerıkanyń Florıda shtatynyń jaǵalaýynda Atlant muhıtyna qulady.
Meksıkada tirkelgen Learjet 35 jergilikti ýaqyt boıynsha 19:51-de seısenbi kúni Fort-Loderdeıl qalasynyń áýejaıynan Meksıkanyń Kosýmel qalasyna ushyp shyqqan. Ushaq kókke kóterilgennen keıin jarty saǵattan soń ekıpajben baılanys úzilgen.
Azamattyq avıatsııa basqarmasy ókiliniń sózine qaraǵanda, ushaq sýǵa jaǵalaýdan bir jarym shaqyrym qashyqtyqta qulaǵan. Apat aýdanynda izdeý-qutqarý sharalary júrgizilip jatyr. Qazir eki adamnyń denesi tabyldy.
