Florıda turǵyndarynyń qaýipsiz jerge kóshýge ýaqyty qalǵan joq
ASTANA. QazAqparat - Florıda turǵyndaryna jaqyndap kele jatqan «Irma» daýylynyń qaýpine baılanysty óz úılerinen tastap, qaýipsiz jerge baryp panalaýdy, sondaı-aq saıahatqa shyqpaýdy aıtyp jatyrmyz, dep málimdedi Florıda gýbernatory Rık Skott.
Onyń sózderine qaraǵanda, qaýip-qater aımaǵynan ketýge endi kesh, dep jazady Bı-bı-sı.
Florıdada jergilikti bılik 6,3 mln turǵynǵa evakýatsııalanýǵa buıryq shyǵarǵan, bul shtat halqynyń tórtten biri degen sóz.
Buǵan deıin daýyldyń Kýbada oıran salýynyń saldarynan neser jańbyr jaýyp, kúshti jel turǵan. Jergilikti úkimettiń málimdemesine súıensek, ol jaǵalaýdaǵy eldi mekender men kýrorttarǵa zor shyǵyn keltirip, birneshe aýdandy elektr jaryǵynsyz qaldyrǵan.
BAQ málimetteri boıynsha, Kýbada jeldiń jyldamdyǵy saǵatyna 250 kılommetrge, tolqyndardyń bıiktigi jeti metrge deıin jetken. Mıllıonnan astam kýbalyq daýyldan qaýipsiz jerge kóshirilgen, qurban bolǵandar týraly málimetter joq.
«Irma» daýylynyń qýaty senbi kúni besinshi deńgeıden úshinshi deńgeıge deıin túsken, biraq sınoptıkter daýyl Florıdaǵa jetkenshe barynsha kúsheıip ketýi múmkin dep qaýiptenedi.
