Florentsııa bıligi qalanyń tarıhı ortalyǵynda tamaq jeýge tyıym salmaq
ASTANA. QazAqparat - Italııada Florentsııa bıligi qalanyń tarıhı ortalyǵynda tamaq jeýge tyıym salý bastamasyn kóterdi. Ereje buzǵandarǵa 150-500 eýro tóńireginde aıyppul salynady, dep habarlaıdy «QazAqparat» HAA CNN-ge silteme jasap.
Qala merııasynyń 4 qyrkúıek kúni kúshine engen qaýlysy adamdardyń qalanyń tarıhı ortalyǵynda trotýarlarda, joldarda, dúkender men úılerdiń mańynda júrek jalǵaýyna tyıym salady.
Qaýlynyń kúshi júretin Via de 'Neri, Piazzale degli Uffizi, Piazza del Grano jáne Via della Ninna kósheleri qalanyń eń adam kóp júretin kósheleri bolyp tabylady. Onda tús kezinen keshki úshke sheıin jáne 18:00 - 22:00 aralyǵynda tamaqtanýǵa tyıym salyndy.
Qala meri Darıo Nardella Facebook-te tarıhı úılerdiń, shirkeýlerdiń baspaldaqtarynda júrek jalǵap otyrǵan adamdar basqa týrısterdiń júrýine kedergi jasaıtynyn, sonyń saldarynan keptelister bolatynyn jazdy. Qala basshysynyń aıtýynsha, týrısterdiń arasynda qoqsyq tastaıtyndar da jıi kezdesedi.
Aıta keteıik, jyl saıyn Florentsııaǵa 10,2 mıllıondaı týrıst keledi.
Eske sala keteıik, Rımde de sýburqaqtardyń aldynda tamaq jeýge tyıym salynǵan.
