Flesh-karta adam óltirgen qylmyskerlerdi anyqtaýǵa kómektesti - ІІM
ASTANA. 19 qazan. QazAqparat /Arman Asqarov/ - Almaty qalasynyń polıtseıleri 31 jastaǵy jergilikti turǵyndy óltirý oqıǵasyna qatysy bar qylmyskerlerdi flesh-karta arqyly anyqtady.
Bul týraly búgin QR ІІM Til saıasaty jáne aqparat departamentiniń bastyǵy Nurdildá Oraz málim etti.
Onyń habarlaýynsha, belgisiz azamattyń máıiti qyrkúıek aıynyń sońynda Almaty qalasyndaǵy shaǵyn aýdandardyń birinde tabylǵan bolatyn. Onyń qaltasynan tabylǵan flesh-kartadan shyǵarylǵan fotosýretter arqyly onyń jeke basy anyqtaldy. Jedel-izdestirý is-sharalary barysynda jábir kórgen azamattyń qalanyń jıhaz tsehtarynyń birinde jumys istegeni anyqtaldy. Qylmys bolǵan kúni ol jáne Almaty oblysynyń úsh turǵyny birigip, tsehta ishimdik ishken. «Otyrys» barysynda shyqqan urys-keristiń nátıjesinde úsheýi ony soqqyǵa jyqqan. Al tańerteń jábirlenýshiniń kóz jumǵanyn kórgennen keıin máıitten qutylý maqsatynda tsehtaǵy quraldaryn paıdalana otyryp, onyń denesin múshelep, sómkege salyp, alańqaı jerdegi shuńqyrǵa laqtyryp jibergen. Sodan keıin benzın quıyp, órtegen. Polıtseıler qylmys jasaǵandardyń bireýin, ıaǵnı Almaty oblysy Dostyq stansasynyń 23 jastaǵy turǵynyn ustady. Ol óz kinásin tolyq moıyndap otyr. Qalǵan qylmyskerler izdestirilýde», - dep atap kórsetti N.Oraz.
