Fleksıtank pen ISO-tank: Ortalyq Azııa men Kavkaz arqyly suıyq júkter qalaı tasymaldanady
ASTANA. KAZINFORM – Qytaı men Ortalyq Azııany Qazaqstan, Ázerbaıjan jáne Grýzııa porttary arqyly Eýropamen baılanystyratyn Transkaspıı halyqaralyq kólik baǵyty, ıaǵnı Orta dáliz óńirdegi eń qarqyndy logıstıkalyq baǵyttardyń birine aınalyp keledi.
2022 jyldyń ózinde osy baǵytpen tasymaldanǵan júk kólemi eki esege jýyq artqan. Al Túrkııa aýmaǵy arqyly ótetin tranzıt kólemi sońǵy on jylda alty ese ósti.
Tasymal kóleminiń artýy suıyq júkterdi, sonyń ishinde hımııalyq ónimderdi, ósimdik jáne bazalyq maılardy, sondaı-aq basqa da qaýipti emes ónerkásiptik suıyqtyqtardy tasymaldaýshylar úshin jańa mindetter týǵyzyp otyr.
Ortalyq Azııanyń ashyq muhıtqa tikeleı shyǵatyn joly joq. Sondyqtan óńirden Eýropaǵa nemese keri baǵytta tasymaldanatyn júk birneshe ret temirjoldan paromǵa, odan avtomobıl kóligine aýystyrylady ári birneshe kedendik aýmaqtan ótedi. Bir ǵana teńiz tasymalyna arnalǵan jabdyq mundaı kúrdeli logıstıkalyq tizbekke árdaıym beıim bola bermeıdi.
Mundaı baǵyttarda negizinen eki túrli sheshim qoldanylady.
Birinshisi – fleksıtank. Bul standartty 20 fýttyq konteınerdiń ishine ornatylatyn, taǵam ónimderin tasymaldaý talaptaryna saı keletin bir rettik kópqabatty jumsaq rezervýar. Oǵan 14-24 myń lıtrge deıin qaýipti emes suıyqtyq syıady.
Fleksıtank ásirese Qazaqstan men Ózbekstannan ósimdik maılaryn eksporttaý sekildi bir baǵyttaǵy tasymal úshin ekonomıkalyq jaǵynan tıimdi. Ony ornatý jáne júkti túsirý shamamen jarty saǵat ýaqyt alady. Bul Orta dálizdegi kóliktiń birneshe túri túıisetin logıstıkalyq toraptarda mańyzdy artyqshylyq sanalady.
Ekinshi sheshim – tank-konteıner nemese ISO-tank. Ol tot baspaıtyn bolattan jasalǵan, birneshe ret paıdalanýǵa arnalǵan tsısterna jáne T-kod boıynsha jikteledi.
ISO-tankter qaýipti nemese temperatýralyq rejımdi qatań saqtaýdy qajet etetin júkterdi, sondaı-aq bir baǵyt boıynsha turaqty tasymaldanatyn ónimderdi jetkizý úshin qoldanylady. Mundaı konteınerler azyq-túlik jáne hımııa ónerkásibindegi qatań standarttardy saqtaýdy qajet etetin tasymalda tıimdi.
– Orta dáliz Qazaqstandaǵy Aqtaý jáne Quryq porttary arqyly ótip, odan ári parommen Ázerbaıjandaǵy Alıat portyna jalǵasady. Keıin júk Grýzııanyń Potı jáne Batýmı porttary arqyly nemese Baký–Tbılısı–Kars temirjolymen Túrkııa men Eýropalyq odaq elderine jetkiziledi. Aqtaý porty arqyly jylyna shamamen 12 mln tonna, al Alıat arqyly 15 mln tonnaǵa jýyq júk ótedi, – delingen materıalda.
Bul baǵytta suıyq júkter logıstıkasymen 2010 jyldan beri Kricon Group kompanııasy aınalysyp keledi. Kompanııa parkinde 2 myńnan astam tank-konteıner bar.
Qazaqstan, Ázerbaıjan jáne Túrikmenstanda kompanııanyń jeke depolary, tazalaý stantsııalary men avtoparki ornalasqan. Bul júkterdi Batys Eýropadan qajetti jabdyqtyń jetkizilýin kútpeı-aq jergilikti jerde óńdeýge jáne qyzmet kórsetýge múmkindik beredi.
Aıta keteıik, Qasym-Jomart Toqaev Orta dálizdi damytý tetikterin atady.
